Lækkun fasteignaskatta

Nýr meirihluti í Reykjavík hefur boðað lækkun fasteignaskatta á eldri borgara. Vonandi mun nýr meirihluti F og D lista lækka fasteignaskatta á íbúðarhúsnæði almennt. Nú er það svo að fasteignamat á Íslandi hefur hækkað nálægt 18% á síðasta ári. Það er því allsvakaleg skattahækkun framundan hjá húsnæðiseigendum.

Sjálfstæðismenn í Árborg hafa ítrekað lagt fram tillögur um lækkun fasteignaskatta, ekki síst með 100% afslætti á eldri borgara með ákveðnum reglum og svo ekki síður með almennri lækkun fasteignaskatts nú síðast í Desember þar sem við lögðum til að fasteignaskattshlutfall yrði lækkað um 10% úr 0,3% í 0,27%.

Í dag er verðbólgan há og verðbætur á lánum bíta fast í. Framundan eru kjaraviðræður verkalýðsfélaganna og viðsemjenda þeirra. ASÍ hefur bent á það sem ríki og sveitarfélög geta gert og hér er það lækkun fasteignaskatta sem skiptir mestu.

Vonandi sjá menn að sér og varast þá freistingu sem felst í hækkandi fasteignamati og sjálfkrafa skattahækkunum.

Athugasemdir

[Theódór Norðkvist, 23.1.2008 kl. 00:53]

Þinn flokkur, Eyþór, á heiðurinn af því að markaðsverð á íbúðarhúsnæði á höfuðborgarsvæðinu hefur tvöfaldast á fjórum árum.

Ungt fólk sem er að hefja búskap getur ekki keypt mannsæmandi húsnæði, nema gerast leiguþrælar fégírugra bankanna eða Íbúðarlánasjóðs til elliáranna.

Fasteignagjöld til hins opinbera, jafnvel þó þau hækki, eru smáaurar við hliðina á þessum fasteignaskatti sem hinn frábæri frjálsi markaður hefur lagt á fólk sem vill koma sér upp þaki yfir höfuðið.

[Eyþór Laxdal Arnalds, 23.1.2008 kl. 00:55]

Við erum þá amk. sammála um að best sé að lækka fasteignaskatta Theódór?

[Theódór Norðkvist, 23.1.2008 kl. 11:56]

Já, ef kostur er. Þó er skárra að borga einhverja skatta og þurfa ekki að loka deildum á sjúkrahúsum og láta gamalmenni liggja hjálparlaus í eigin saur, af því að það fæst enginn Íslendingur til að vinna umönnunarstörf vegna lélegra launa.

[Loftur Altice Þorsteinsson, 23.1.2008 kl. 13:50]

Málefnasamningur hins nýja meirihluta gerir ráð fyrir lækkun fasteignaskatta á öllu íbúðarhúsnæði !

Þetta er orðað svo:

Sérstök áhersla verður lögð á eftirfarandi verkefni:

•  
  • Fasteignaskattar á íbúðarhúsnæði verða lækkaðir á árinu.

Nánar má lesa hér:

http://www.mbl.is/mm/frettir/innlent/2008/01/21/f_listi_og_d_listi_i_samstarf/

[Þórdís Bára Hannesdóttir, 23.1.2008 kl. 14:55]

Gott hjá þér Theódór. Sammála.

[Auðbergur Daníel Gíslason, 23.1.2008 kl. 16:34]

Theódór: Það er hefur nú verið reiknað út að ef ríkið lækkar skatta hækka tekjur ríkisins. Sjálfstæðisflokkurinn fer nú fyrir heilbrigðismálum og hefur Guðlaugur Þór sýnt að honum er vel treystandi í það starf.

Eyþór: Ég vil óska þér og öðrum félögum okkar innan Sjálfstæðisflokksins, borgarbúum og öllum íslendingum til hamingju með nýjan meirihluta í borginni. Menn geta loks aftur farið að vinna að þeim góðu málum sem unnið var að á fyrri hluta kjörtímabilsins.

Auðbergur D. Gíslason
14 ára Sjálfstæðismaður

[Theódór Norðkvist, 23.1.2008 kl. 21:42]

Gaman að ungum mönnum eins og Auðbergi Daníel, sem hafa áhuga á stjórnmálum og eru að mynda sér skoðanir.

En hefurðu velt einu fyrir þér Auðbergur: Ef tekjur ríkisins hafa hækkað svona svakalega af hverju eru þá flestar umönnunar- og heilbrigðisstofnanir fjársveltar það mikið að það er ekki hægt að borga starfsfólki þeirra mannsæmandi laun?