Prófkjör

Engin ein leið er fullkomin við að raða frambjóðendum á lista og eru eftirmál úr nokkrum prófkjörum undanfarið staðfesting á þeirri reglu. Prófkjör eru þó lýðræðislegri en uppstilling þar sem fleiri koma að valinu og má því segja að prófkjör veiti að vissu leyti meira pólítískt umboð. 

Prófkjör hafa verið algeng sérstaklega hjá Sjálfstæðisflokknum en á síðustu árum hafa þau sumpart farið úr böndunum varðand fjárútlát, auglýsingamennsku og smölun. Nú hefur verið ákveðið að halda prófkjör hér í Árborg hjá okkur þann 13. mars. Síðasta prófkjör tókst mjög vel en þá tvöfaldaðist fjöldi flokkbundinna Sjálfstæðismanna í Árborg og svo tvöfaldaðist fjöldi bæjarfulltrúa í kosningunum þar á eftir úr 2 í 4.

Nú hefur verið ákveðið að fara prófkjörsleiðina á ný. Kjörnefnd beinir þeim tilmælum til frambjóðenda að þeir stilli kostnaði í hóf og er það skynsamlegt hjá kjörnefndarmönnum. Óhóf í auglýsingum fór yfir velsæmismörk í góðærinu á stundum en nú er óhóf einfaldlega óviðeigandi og getur hreinlega virkað öfugt á kjósendur.

Í dag vill fólk heyra sannleikann og færri loforð. Almenningur veit betur en svo að unnt sé að slá ryki í augu hans hvort sem er í prófkjörum, kosningum eða af hálfu forsvarsmanna sveitarfélaga. Sannleikurinn er sá að nú þarf að kljást við skuldahala hjá mörgum sveitarfélögum og því er ábyrgðarleysi að horfast ekki í augu við hann.

Ég á von á að góður hópur gefi kost á sér þar sem straumurinn liggur til okkar eins og kannanir Gallup sýna. Í raun er nauðsynlegt að það séu ekki of fáir þegar farið er í prófkjör á annað borð. Annars er einfaldlega hægt að stilla upp.

Athugasemdir

[Sumarliði Einar Daðason, 10.2.2010 kl. 03:34]

Ég er búin að líta upp til þín alla ævi, fyrir utan "Hit'n'Run" og draumalandið í "OZ". Er ekki kominn tími til þess að gáfaðir menn eins og þú komi með lausnir í stað þess að hafa áhyggjur að hver kjósi hvern á lista?

Þarf að teikna mynd af því sem er að gerast hér á Íslandi? Við erum að sökkva sem þjóð og stjórnmálamenn eru bara að lýsa kaffinu!!!

[Eyþór Laxdal Arnalds, 10.2.2010 kl. 08:46]

Það er algerlega rétt hjá þér Sumarliði að ástandið er grafalvarlegt. Engu að síður skiptir máli hverjir gefa sig að því að taka þátt í stjórnmálum sem ekki eru hátt skrifuð þessa dagana. Ef ekkert er gert í atvinnumálum og álögur hækka áfram verður hér áfram landflótti með tilheyrandi víxlverkunum. Ég hef lagt áherslu á nýjar leiðir í iðnaði sem ég held að sé ein mikilvægasta vítamínsprautan fyrir efnahagslífið.

[Sumarliði Einar Daðason, 10.2.2010 kl. 12:46]

Þetta kerfi sem við búum við núna er nánast hannað til að kæfa alla frumsköpun og sjálfbæra atvinnusköpun. Það byggist nánast alfarið á hver segir skemmtilegustu brandarana og hvaða sonur eða dóttir fær vinnu við næsta "atvinnuskapandi" verkefni.

Það var jákvætt þegar SÍS, kolkrabbinn, smokkfiskurinn og allt þetta fór að líða undir lok en það eru sömu fuglahræður ennþá að kúga fólk og nota þessa aðferð: "ef þú kýst mig ekki og ýtir að mér hlunnindum, sem og minni fjölskyldu - þá verður ekki líft fyrir þig á Íslandi".

Ég veit að þú hefur þurft að þola þetta sjálfur og þekkir hvernig þetta virkar - en það eru fáir sem þora að tala um það. Getur verið að þú komir út úr skápnum? Ég er á góðri leið með það.