Dýr yfirbygging

Nú hefur þjóðarframleiðslan minnkað mikið og mælist nú 40% lægri í dollurum talið en hún var fyrir hrun.
Kaupmáttur hefur rýrnað hratt og er þá sama hvaða mælikvarði er notaður.

Sveitarfélögin hafa stækkað hraðar en hagkerfið og standa nú eftir með gríðarlegar skuldir og í einstaka tilfellum viðvarandi taprekstur. Eitt af því sem óx hraðast í góðærinu var stjórnkerfið enda standa ráðhús í mörgum sveitarfélögum með mikla yfirbyggingu. Fjöldi bæjarstjóra, fjármálastjóra, starfsmannastjóra og annara millistjórnenda er í litlu samræmi við íslenskan raunveruleika.

Mörgum þykir undarlegt að reka 7 sveitarfélög á höfuðborgarsvæðinu sem í samkeppni sinni hafa aukið skuldir sínar. Frægast er dæmið frá Álftanesi, en eins og Grikkland getur svarti sauðurinn verið vísir að því sem koma skal ef menn gæta sín ekki og taka í taumana.

Hér á Suðurlandi eru enn fjölmörg sveitarfélög og á "árborgarsvæðinu" eru þrjú bæjarfélög; Árborg, Ölfus og Hveragerði sem eru hver með sinn bæjarstjóra og sína millistjórnendur. Öll eru þau með sitt ráðhús og þar til nýlega þrjú slökkvilið. Kostnaður við stjórnun hefur lítið minnkað þrátt fyrir hrunið þrátt fyrir að umsvifin hafi minnkað. Það er skylda þeirra sem koma að sveitarstjórnarmálum að horfa fyrst á yfirbygginguna áður en álögur eru hækkað á íbúa.

Fasteignagjöld hafa snarhækkað á undanförnum misserum. Það eru takmörk fyrir því hvað unnt er að leggja á fólk. Dæmi eru um eldri borgara sem óttast að missa húsin sín vegna þessara gjalda. Það er engum greiði gerður að fólk á efri árum fari á vergang. Í því felst ekkert nema tjón. Bæði fjárhagslegt og tilfinningalegt. Hvernig væri að huga að þessum þætti í aðdraganda sveitarfstjórnakosninga?

Athugasemdir

[Jón Ólafur Vilhjálmsson, 10.2.2010 kl. 16:12]

Eyþór ég hef talað fyrir því að við hættum að vera með bæjarstjóra sem er bæjarstjóri eins og við þekkjum heldur ráðum framkvæmdastjóra sem um leið er fjármálastjóri og er hann þá ráðinn til margra ára síðan verði forseti bæjarstjórnar sá aðili sem heldur ræður á titildögum og kemur fram fyrir sveitarfélagið opinberlega.

Þannig kæmi festa í störfin í sveitarfélögunum og ekki neyt hringl á fjögra ára fresti þá myndum við losna við biðlaun og annað er því fylgir að fá pólitískan bæjarstjóra.

Við eigum að reka sveitarfélög eins og fyrirtæki með kjörinni stjórn sem leggur línurnar og svo er teymi sem sér um reksturinn.

[Hörður Halldórsson, 10.2.2010 kl. 19:12]

Bý í Breiðholti ,nýju Kópavogshverfin Lindir Kórar hefðu átt að vera samhæfð meira Breiðholtshverfinu enda eru Linda og  Kórahverfin nánast framhald af Seljahverfinu.Ættu kannski að hafa tvö sveitarfélög á Höfuðborgarsvæðinu .Kraginn +Breiðholt   (stór-Hafnarfj .kominn? ) Reykjavík+Mosfellsbær.Bara hugmynd.