Orð Davíðs og niðurstaða Hafnfirðinga

Þegar Davíð Oddsson talar hlustar þjóðin. Sama hvar menn standa í pólítík eða hvaða skoðun þeir hafa á málum. Þetta hefur ekki breyst þótt hann sé hættur í pólítik og sé nú orðinn seðlabankastjóri. Sú var tíðin að Davíð sló af kreppu og hafði áhrif á viðskiptalífið með viðhorfum sínum í ræðum. Þetta er ekki öllum gefið þó forsætisráðherrar séu. Nú er Davíð í stöðu seðlabankastjóra og hefur beitt stýrivöxtum sem viðnámsverkfæri gegn verðbólgu. Orð hans vikta líka þungt. Það er ekki einsdæmi að orð seðlabankastjóra hafi áhrif á markaði og ákvarðanir. Skemmst er að minnast Alan Greenspan fyrrum seðlabankastjóra BNA, en fjölmiðlar og sérfræðingar eyddu talsverðum tíma í að túlka lýsingarorð bankastjórans til að meta hvaða horfur væru í vaxta- og efnahagsmálum. Í íbúakosningunum í gær voru þrjú atriði sem vógu þyngst hjá þeim sem höfnuðu álversstækkun; umhverfismál í Hafnarfirði, andstaða í virkjanamálum og áhyggjur af efnahagsspennu.

Þetta sagði Davíð meðal annars um uppbyggingu álvera á næstunni sem hann lét falla fyrir helgi:

"Önnur áhætta sem vert er að gefa gaum eru áform um uppbyggingu frekari áliðju með tilheyrandi virkjunum. Verði af þeim á spátímanum myndi hægja á hjöðnun framleiðsluspennu en forsenda varanlegrar hjöðnunar verðbólgu er að spennan hverfi. Þá gæti reynst nauðsynlegt að hækka stýrivexti og í öllu falli að halda þeim háum lengur en felst í grunnspánni ef halda á verðbólgu í skefjum eins og lýst er í öðru fráviksdæmi."

Margir litu svo á að hér væri varað við stækkun í Straumsvík. Sumir hafa gengið svo langt að segja þessi orð hafi skipt sköpum þegar aðeins 88 atkvæði réðu úrslitum. Ef 45 NEI hefðu verið JÁ, hefði stækkun verið samþykkt.

Eitt er víst að orð Davíðs vekja alltaf athygli og vikta þungt.

Athugasemdir

[Auðun Gíslason, 1.4.2007 kl. 15:10]

Er ekki Davíð einskonar blaðafulltrúi Seðlabankans. Annars hefði hann eins getað lesið spá Greiningardeildar Glitnis sem birtist viku fyrr. Að Davíð sé einhver hagspekingur það eru þá fréttir útaf fyrir sig. Annars er nú þessi persónudýrkun á Davíð svipuð og dýrkunin á Kim il Sung. Jafn leiðinleg! 

[Haraldur Haraldsson, 1.4.2007 kl. 16:03]

Eg held að Davið hafi þarna haft mikið að segja /og það verður að segja sannleikan,en hann er oft ekki vinsæll!!!Halli Gamli

[Hlynur Hallsson, 1.4.2007 kl. 17:26]

Múhaa..ha, áttu annan Eyþór? Mér finnst Auðun betri. Bestu kveðjur,

[Sigfús Sigurþórsson., 1.4.2007 kl. 18:44]

Það eru orð að sönnu Eyþór og seniilega deilir enginn heilvita maður um það og þessvegna er nokkuð líklegt að þessi orð hanns vegi þungt í þessu tilfelli.

[Ólafur Als, 1.4.2007 kl. 18:49]

Alltaf ferskt þegar spaugarar á borð vid Auðun gefa manni innsýn í hugarheim sinn. Sérlega forvitnilegt einnig að afkvæmi forræðishyggjunnar hafi sama húmor. Annars eru þetta forvitnilegar bollaleggingar en vitanlega eru þær ekki annað en það.

[Ólafur Als, 1.4.2007 kl. 19:17]

P.S. var atkvæðagreiðslan ekki yfirstaðan (spurt er) ?

[Hafliði, 1.4.2007 kl. 20:53]

Það er afar stutt á milli olofs og háðs. Veit ekki alveg hvar ég hef þig hérna?

[Jens Guð, 2.4.2007 kl. 01:02]

  Þannig að það var Davíð Oddsson sem er sigurvegari í atkvæðagreiðslu Gaflara? 

[Hafsteinn Viðar Ásgeirsson, 2.4.2007 kl. 13:53]

Þetta kom meðal annars fram í viðtölum við fólk á kjördag. Vitlaust en svona er það, þegar Davíð opnar munninn eru ansi margir sem hlusta. En þetta mál er dautt...... og Davíð vann .....?.