Að hika er sama og tapa

Stjórnin heldur með eins manns mun. Það er því eingöngu hægt að halda áfram (ekkert stopp) með fullri samstöðu innan flokkanna beggja. Framsókn virðist vera hikandi eftir síðustu fundi um hvert framhaldið skuli vera. Það er alveg sama í hvern fótinn Framsókn stígur næst: Skrefið er tekið með efa.

Sjálfstæðisflokkurinn stendur staðfastur og óskiptur að baki Geir H. Haarde. Nú reynir á Framsókn að taka afstöðu. Í dag vilja margir "í grasrót" Framsóknar að flokkurinn fari í stjórnarandstöðu. Það er erfið leið fyrir formanninn sem er utan þings.

Sumir þingmenn Framsóknar virðast vilja vinstri stjórn og vakti athygli hvernig áherslur varaformaðurinn Guðni Ágústsson boðaði ásamt Bjarna sveitunga sínum Harðarsyni. Þá er vert að minnast þess að ekki er langt síðan Jón og Jónína voru í framboði gegn Siv og Guðna. Annar armurinn er með formennskuna en hinn er á þingi.

VG virðast fremur vilja vera í stjórnarandstöðu en framlengja líf Framsóknar. Öðru vísi er ekki hægt að túlka málflutning Ögmundar og Steingríms J. Sigfússonar.

Í svona viðkvæmri stöðu er ekki gott að hika. Allra síst fyrir fámennan þingflokk.

Athugasemdir

[Jenný Anna Baldursdóttir, 15.5.2007 kl. 16:56]

Finnst þér ekkert athugavert við að flokkur sem geldur þvílíkt afhroð eins og Framsókn sitji áfram í stjórn?  Jú ég veit að stjórnin heldur tæknilega en er það nóg?

[Vilborg Traustadóttir, 15.5.2007 kl. 18:44]

Sammála þér Eyþór.  Það á að nota "skellinn" til að laga stöðuna og halda ótrauð áfram.  Það gerðir þú, það gerði ég, það eiga Framsóknarmenn að gera. Ef stjórnin heldur "tæknilega" reynir bara meira á hana að gera ekki "tæknileg" mistök.

[Haraldur Haraldsson, 15.5.2007 kl. 21:07]

Kvitt /við verðum að skoða eittvað annað er Framsokn nuna,meirihlutin er of tæpur!!!Ef þessi stjórn heldur áfram verður allt vittlaust i þessu þjóðfelagi um það er eg viss/skoðum málin betur/Halli Gamli

[Presturinn, 17.5.2007 kl. 09:29]

Geir veit hvað hann syngur (og hann syngur vel). Það að hann ræði við Framsókn segir okkur tvennt. Í fyrsta lagi að það sé hægt að mynda stjórn með Framsókn og í öðru lagi að það sé ekki hægt að mynda stjórn með öðrum en Framsókn.

Auðvitað vill Geir mynda sterkan meirihluta. En meirihlutinn þarf ekki bara að vera sterkur í þingmönnum talið. Innan meirihlutans þurfa að vera sterkir samstarfshæfir einstaklingar sem ganga í takt. Samstarf virkar ekki þegar hver og einn dansar eftir sínu lagi. Vilji Geir til að ræða við Framsókn segir meira um VG og Samfylkinguna en það gerir um gengi Framsóknar í kosningunum.

Geir vill góða og sterka stjórn. Hann metur það greinilega þannig að það sé meri styrkur í einum Framsóknarmanni en 18 krötum eða 9 kommar. Hann hefur vissulega eitthvað til síns máls þar.