Enn hækkar olían

Hráolían hækkaði hressilega á síðustu dögum og nálgast nú 70 dali. Samkvæmt Bloomberg telja flestir greininingaraðilar að þetta muni halda áfram á næstu dögum. Ísland er orkuland, þó ekki sé það (ennþá) olíuríki. Hitaveita og raforkuvinnsla úr endurnýjanlegum orkugjöfum setur okkur í tvennskonar sérstöðu: Ísland er minna háð olíuhækkunum en flest önnur ríki hvað varðar útgjöld og svo hitt að við erum "grænni" en öll önnur ríki sem við miðum okkur við.

Samningar vegna raforkusölu fara hækkandi, bæði hér á landi og erlendis. Oft er um langtímasamninga að ræða og þegar þeir losna hækkar verðið á ný. Þetta veldur því að breytingar á raforkuverði eru hægfara og ætla má að veruleg undirliggjandi verðhækkun sé því innbyggð í heimsmarkað á raforkuverði.

BP spáir því að aðeins 40 ár séu í að olían sé uppurin. Reyndar er það svo að BP hefur spáð þessu áður fyrir áratugum síðan og þá voru það líka 40 ár. Spádómar sem þessir eru kannski ekki yfir gagnrýni hafnir, en eitt eru menn sammála um og það er að olían verður sífellt dýrari í vinnslu. Menn þurfa að kafa dýpra í setlög á hafsbotni, vinna úr þurrausnum olíulindum og jafnvel vinna olíu úr sandi og bergi. Slík vinnsla kostar meira sem aftur skilar sér beint til neytenda.

Verður bensínlítrinn kominn í 200 kall á næstu árum?

Athugasemdir

[Geir Ágústsson, 17.6.2007 kl. 20:48]

Aðalflöskuháls olíumarkaðarins er ríkiseinokun í mörgum þeirra landa þar sem hvað mesta olíu er að finna í jörðu, og þá er ég að meina OPEC-ríkin. Saudi-Arabar hafa t.d. bara borað um eina tilraunaborholu á móti hverjum hundrað í Bandaríkjunum, ástandið í Venesúela þekkja flestir og Írakar verða seint kallaðir framherjar einkaframtaksins í olíuvinnslu. Olían mun duga í a.m.k. 50 ef ekki 70 ár til viðbótar, og þá verður að sjálfsögðu verðið á henni fyrir löngu orðið það hátt að nýjir OG hagkvæmir orkugjafar hafa stormað fram og náð miklum vinsældum.

Vindur og sólarorka er bara dekur ríku landanna við sjálf sig því þau halda að hin minniháttar gróðurhúsalofttegund, koltvísýringur, hafi eitthvað mikið um loftslag á Jörðinni að segja.