Toys"я"Us?

Toys"R"us, eða Tojsar-öss eins og skráð gæti verið í Billjónsdagbók er táknmynd um margt á Íslandi í dag. Eilífar umferðartafir hafa sett mark sitt á nágrenni Smáralindar og er þó ekki búið að opna stóra turninn sem nú rís. Toys"R"us var að opna og landinn kaupir stíft.

Sagt er að Íslendingar fái oft dellu fyrir hlutum, enda muna margir eftir fótanuddtækjunum, sodastreaminu og nú síðast fjórhjólunum. Sagt hefur verið um karlmenn að; "the only difference between men and boys is the price of the toys".

Bílaeign, húsbyggingar og nú síðast einkaflugvélar á Reykjavíkurflugvelli eru dæmi um íslensk leikföng samtímans. Þau eru svo sannarlega að verða dýrari með hverju árinu. Nú ætlar samgönguráðherrann að skoða sérstakar álögur vegna einkaflugvéla. Ekki er víst að það slái farþegana út af laginu. Við erum nefninlega þannig að við samsömum okkur leikföngunum stundum. Kannski á nafn búðarinnar við okkur mörg hver, ung og eldri:

Toys are us?

Athugasemdir

[Púkinn, 5.11.2007 kl. 23:29]

Munurinn er bara sá að leikföng litlu strákanna eru mun ódýrari en leikföng stóru strákanna...

[Jón Steinar Ragnarsson, 6.11.2007 kl. 02:00]

Allt er þetta svo rekið á lánum, sem erlendir spekúlantar vilja ólmir láta okkur fá í hinu "hagstæða" vaxtabrjálæðisumhverfi.  Stýrivextirnir þufra ekki að súnka mikið til að þessi dúdar innkalli kröfurnar ´sem eru að nálgast billjón (1000 milljarða) í skammtímaskuldbindingum. Þá förum við öll á uppboð og gerumst leiguþý erlendra lénsherra að nýju.  Nú hamast menn við að róta til sín hagstæðum veðum til að viðhalda þenslumartröðinni aðeins lengur, Orkan og orkudreifingin, vatnsréttindin, landgæðin etc.  Allt er þetta gert til að verja okkur tímabundið gegn gjaldþroti og framlengja víxilinn.  Davíð og Geir stjórna engu hér. Þeirra er að halda stýrivaxtablöðrunni þaninni og búið.  Er virkilega enginn sem sér hið stóra samhengi í þessari vitleysu allri saman?

Þjóðin er orðin að örvænturm neyslufíklum, sem gera hvað sem er til að fá næsta fix og eru þá siðferði og lög, aukaatriði.  Fólki varð að hleypa inn  í nefnda búð í hollum eins og rollum í rétt til að geta keypt plastdrasl frá kína á uppsprengdu verði og við settum heimsmet í draslkaupum í nokkra daga þarna.  Vitfirringin er alger og tómið í brjóstinu stækkar eftir því sem meira af drasli er haugað í, rétt eins og gildir með aðra fíknisjúkdóma.

Ég segi eins og gamli vestfirski bóndin: Þetta fer illa á hvorn veginn sem það fer.