Framlag ríkisstjórnarinnar

Þessir samningar hefðu sjálfsagt aldrei náðst á þessum nótum ef ríkisstjórnin hefði ekki lagt sín lóð á vogarskálarnar. Hækkun persónuafsláttar og lækkun tekjuskatts eru sennilega þyngstu lóðin, en jafnframt er komið til móts við ýmsa hópa.

Almennustu og gagnsæjustu aðgerðirnar eru happasælastar og þær bæta Ísland enn frekar í samkeppninni við umheiminn.

Kaupmáttur eykst og fyrirtækjum er refsað minna fyrir hagnað.

Hvoru tveggja á að auka hagvöxt á erfiðum tímum.

Taxtar hækka um 18.000 krónur

Athugasemdir

[Heimir Lárusson Fjeldsted, 17.2.2008 kl. 23:00]

"Kaupmáttur eykst og fyrirtækjum er refsað minna fyrir hagnað."

Hvaða hagfræði hefur þú lesið Eyþór ef framlag til samfélagsins fyrir allt sem það veitir heitir refsing?

Eiga fyrirtæki ekki að taka þá í samfélagsuppbyggingunni?

Þú veist líklega að elli- og örorkulaunþegar greiða skatta af sínum sposlum frá því opinbera?

Eða hvað?

[Eyþór Laxdal Arnalds, 18.2.2008 kl. 00:29]

Heill og sæll Heimir. Ég ætla manna síðastur að mæla með eftirlaunasköttunum. Svo mikið er víst.

Þá eru tekjutengingar bóta umhugsunarverðar.

Skattar eru byrðar og álögur og því er það hvatning fyrir fyrirtækin að þurfa ekki að skila stórum hluta hagnaðarins í skatta. Fyrirtækin eiga að taka þátt í samfélagskostnaði, enda gera þau það í ótal mörgum gjöldum:

Refsing segi ég hér að ofan, enda er það svo að verðmætasköpunin er margsköttuð:

a) Laun eru skattlögð og því þarf að greiða þess hærri laun út úr fyrirtækjunum

b) Sífellt fleiri gjöld eru lögð á fyrirtækin (eins og nýi 0,13% launatengdi skatturinn í samningunum í dag)

c) Hagnaður er skattlagður upp á 18%

d) 10% fjármagnstekjuskattur er greiddur af arðinum - eftir skattlagningu hagnaðar og því til viðbótar

e) Fasteignaskattur er greiddur af byggingunum

f) Og svo er virðisaukaskattur upp á 24,5% af flestum framleiðsluvörum

Þá skulum við ekki gleyma tollunum og aðflutningsgjöldunum sem leggjast á aðföng.

Það er því ljóst að allir þessir skattar skerða hæfi íslenskra framleiðslufyrirtækja í samkeppni við útlönd.

Auk þess er hér hátt gengi og háir vextir.

"Refsing" er kannski stórt orð í þessu samhengi, en þegar allt er saman tekið eru þetta þungar og miklar byrðar og er mikilvægt að þeim sé létt af launafólki og fyrirtækjum svo hér þrífist framleiðsla og verðmætasköpun í landinu.

Takk fyrir innleggið.

[Haraldur Haraldsson, 18.2.2008 kl. 01:18]

Eyþór það er talað um að hækka rauntekju Þeirra tekjulægstu/Ok þetta hefði verið best gert bara i gegnum skattkerfið,það hefur ekki áhrif á verðbólguna en hvað gera þessar 2000 krá ári ekki neitt/hitt eru bara félagsmálapakkar/Halli gamli

[Guðrún María Óskarsdóttir., 18.2.2008 kl. 02:04]

Sæll Eyþór.

194 krónur sem minni skattar fyrir mig sem launþega á vinnumarkaði breyta litlu sem engu og launahækkanir sem nemur því að vega upp skerðingar vegna verðlagsþróunnar undanfarin ár og áratugi þannig að skattleysimörk hafi haldist í hendur við þróun mála eru ekki í sjónmáli nú frekar en fyrr.

því miður.

kv.gmaria.

[Margrét Össurardóttir (IP-tala skráð) 18.2.2008 kl. 09:40]

Sorry en eftir stendur rúmar 11 þús, kr. til launþegans sem verðlag á eldsneyti étur upp sisona. Skil ekki hversu ánægð þið eruð við að halda fólki í fátæktargildru endalaust. Þú hefur greinilega meiri tekjur en lægstu hóparnir. Reyndu að lifa af 120 þús. kr. á mánuði með tvö börn. það getur enginn helvita maður hér á landi, þó svo launin hækki um 10 þús kr. í útborguðum launum  þá dugar það ekki fyrir leigu, mat, fötum, hita né rafmagni. Skil ekki hvað þið eruð ánægð með ykkur.

[Eyþór Laxdal Arnalds, 18.2.2008 kl. 10:52]

Þeir lægst launuðu fá hæstu krónutöluhækkun. Á sama tíma hækkar persónuafsláttur og persónubundinn afsláttur.

Fyrirtækin hafa svigrúm til launahækkananna ma vegna skattalækkunar

Það má alltaf gera betur og það er amk. ljóst að enn má lækka skatta.

Stóra málið fyrir alla er að það tókst að afstýra verkföllum og ná sátt án þess að verðbólgan fari enn frekar úr böndunum. Það hefði kostað alla mikið. - Nema kannski þá sem lána fólki verðtryggt?

[Ásgrímur Hartmannsson, 18.2.2008 kl. 12:43]

Þeir ættu að leggja persónuafsláttinn af, og taka í staðinn upp 10% tekjuskatt, í stað 38%.  Það sparar pening að sleppa pappísrsvinnunni sem fylgir afslættinum, og þeir sem eru rett yfir mörkum fá allt í einu fullt af pening upp í hendurnar.  Sem er bara gott.