Varasamar skotgrafir

Árásir á heimili fólks og fréttir af sýruárás á Rannveigu Rist vekja upp spurningar á hvaða leið við séum sem samfélag.

Persónulegar árásir einkenna umræðu og skrif.

Á sama tíma er Ísland eina landið í Evrópu sem viðhefur gjaldeyrishöft og er engu líkara en einangrunin sé frekar að aukast á þeim 12 mánuðum sem liðin eru frá hruni bankanna. Það sem núna þarf eru nýsköpun starfa og opnun Íslands.

Allir áttu von á því að leitað yrði að blórabögglum eftir hrunið en skotgrafahernaðurinn er að fara langt með að koma okkur sem þjóð í langvarandi kreppu.

Iðnaðurinn á Íslandi er máttarstoð á krepputímum. Vaxtarbroddar byggðir á orkunotkun eru helsta von okkar á næstu árum. Það er sjálfsblekking ef menn halda að hér sé hægt að lifa á bankastarfssemi og opinberum störfum.

Ekkert er eins mikilvægt þjóðhagslega og gjaldeyrisskapandi störf. Reynum að forðast skotgrafir sem grafa undan framtíðinni. Stöðugleikasáttmálinn var viðleitni til að ná sáttum. Honum er núna ógnað og hann verður að verja. Hér gegna SA og ASÍ lykilhutverki ásamt ríki. Nú ríður á að sóknarfærin séu varin af aðilum vinnumarkaðarins og ríkið hlusti vel á.

Athugasemdir

[Sigurður Grétar Guðmundsson, 3.10.2009 kl. 11:40]

Persónulegar árásir einkenna umræðu og skrif.

 Þetta segir þú Eyþór Arnalds að framan og engan hittir það jafn rækilega fyrir og sjálfan þig. Frá því flokkur þinn, Sjálfstæðisflokkurinn, hrökklaðist frá völdum eftir langt valdatímabil þar sem þessum sama flokki tókst að leggja grundvöllinn að hruninu mikla með einkavinavæðingu bankanna og nýfrjálshyggju þá hefur þú og fjölmargir flokksfélagar þínir meira farið eftir þessu mottói sem ég vitna í:

Persónulegar árásir einkenna umræðu og skrif. 

Í stað þess að sýna auðmýkt og biðja Íslenska þjóð afsökunar á framferði ykkar stundið þið einmitt að sem þú segir. Þið fiskið í gruggugu vatni í öllum málum, haldið að það sé leiðin til að komast aftur til valda.

Er almenningur svo skyni skroppinn að hann láti glepjast?

Þið Sjálfstæðismenn hafið sloppið ótrúlega vel. Þið er ráðist á núverandi Ríkisstjórn vegna ICESAVE en hverjir bjuggu þann óskapnað til? Það voru þeir sem Sjálfstæðisflokkurinn rétti Landsbankann á silfurfati (þar með talinn framkvæmdastjóri Sjálfstæðisflokksins) og þessir útvöldu óreiðumenn  áttu ekki einu sinni fyrir útborguninni, slógu lán í Búnaðarbankanum og  ætlast nú til að eftirstöðvarnar verði afskrifaðar!!!

Við skulum ekki gleyma því að það var núverandi ritstjóri Morgunblaðsins og fyrrum Seðlabankastjóri sem kom þeim banka, sem átti að var bakhjarl íslensks fjármálalífs, á svo kaldan klaka að hann varð gjaldþrota. Ríkisstjórnin neyddist til að byggja Seðlabankann aftur upp með 300 milljarða framlagi, það var og er skelfileg blóðtaka sem við öll súpum seiðið af.

Og þennan mann vörðuð þið með kjafti og klóm og gerið enn og nú hefur hann yfirtekið Morgunblaðið til að gera það að málpípu harðasta kjarnans úr Sjálfstæðisflokknum sem ábyrgð ber á hruninu.

[Héðinn Björnsson, 3.10.2009 kl. 13:31]

Sátt byggist upp við að þeir aðilar sem deila ná saman um málamiðlun. Í öllum helstu deilumálum þjóðarinnar hefur stefnan hinsvegar frekar verið á þá leið að troða í gegn því sem hægt var og því skapast engin sátt. Hversu tilbúnir eru stóriðjusinnarnir að semja? Eða Evróðusinnarnir? Eða talsmenn fjármagnseigenda?

Sáttin er eftir því. 

[Helgi Jóhann Hauksson, 3.10.2009 kl. 13:54]

Evrópusinnar verða að bíta í það súra epli að hafa lengi verið hógværir og leyft ESB-andstæðingum að ráða för. Þó lengi hafi verið meirihlutastuðningur við aðild og mikill meirihluti fólks viljað aðildarviðræður hafa ESB-sinnar haldið að sér höndum því alþingi var öðruvísi skipað og hafa ekki barist með kjafti og kló fyrir aðild og upptöku evru á meðan hún hefði enn bjargað því sem bjargað varð.

Það er t.d. kristaltært að Alþjóða-gjaldeyrissjóðurinn (AGS) er hér aðeins og eingöngu með risalánin og skilyrði þeirra til að bjarga gjaldmiðli okkar krónunni (skapa gjaldeyrisvarforða og koma henni aftur á flot), en með evru og án krónu ætti AGS ekkert gilt erindi hingað.

- Og þá er ótalið allt annað sem hefði lagst með okkur með aðild.

- Þeir sem höfnuðu ESB-aðild með upptöku evru völdu hrunið og AGS.

- Trúlega hefði okkur aldrei grunað hve illa gæti farið og andstæðingar aðildar væru nú að blóta því að þrátt fyrir aðild væri hér [smá] kreppa.

Það er hinsvegar Sjálfstæðisflokkurinn sem hefur rekið einangrunarstefnuna, og sumum Davíðum virðist henta nú að blása í stríðslúrða. Það trix er það elsta í sögunni þegar þarf að fá þjóð til að gleyma hrikalegum mistökum stjórnmálamanna að siga þjóðinni í „stríð“ gegn nágrönnum sínum. - Að kalla á hörðustu viðbrögð Hollendinga og Breta sem sem hafa mikil áhrif í AGS og eins og allar aðrar ESB-þjóðir neitunarvald í ESB m.a. gagnvart aðildarsamningum, er ekki í þágu íslendinga heldur þeirra sem vilja siga þjóðinni í efnahagslegt „stríð“ til að hrikaleg mistök fortíðar týnist og gleymist.

[Valsól (IP-tala skráð) 3.10.2009 kl. 18:03]

Undarlegur fréttaflutningur af þessu sýrumáli. Menn skvetta sýru á bíl. Kona fær sýru á sig af bílnum. Nú er látið og talað eins og einhverjir hafi viljandi skvett sýru í andlitið á Ranveigu, hvernig stendur á því?

Svo mælist ég til að þú svarir Sigurði Grétari hér að ofan, bæði hann og öll þjóðin á skilið svör frá ykkur Sjálfstæðismönnum.

[Eyþór Laxdal Arnalds, 3.10.2009 kl. 19:31]

Valsól: Finnst þér virkilega vera í lagi að lauma eiturefnum á fjölskyldubíl?

Sigurði get ég svarað því að Geir H. Haarde hefur beðist afsökunar á því að bankarnir voru seldir í of stórum hlutum. Það voru allir flokkar ánægðir með bankageirann og var Sjálfstæðisflokkurinn ekkert meira í að mæra hina svokölluðu útrás en aðrir flokkar eða forseti vor. Það veist þú Sigurður. Ég hef forðast persónulegar árásir en hef alltaf leyft athugasemdir sama hversu rætnar þær kunna að vera. Kannski ég ætti ekki að gera það enda er ég með óbeinum hætti að hleypa þar fram lágkúrulegum skrifum.

Það er mjög í tísku að ráðast á Sjálfstæðisflokkinn enda var hann lengi við völd. En það er fróðlegt að skoða hvað gerðist á vakt hans.

Hér mæli ég með því Sigurður að þú lesir ágæta samantekt á aukningu útgjalda til velferðarmála á tímabilinu 1999 til 2009 þegar tekið er tillit til verðlagsbreytinga. Hér er um 79% hækkun að ræða:

http://www.fjarmalaraduneyti.is/media/vefrit/Vefrit_fjarmalaraduneytisins_12._februar_2009.pdf

Hvernig má vera að menn kalli þetta tímabil stórfelldra hækkana til velferðamála "nýfrjálshyggju"?

[Eyþór Laxdal Arnalds, 3.10.2009 kl. 19:44]

http://www.fjarmalaraduneyti.is/media/vefrit/Vefrit_fjarmalaraduneytisins_12._februar_2009.pdf

[Helgi Jóhann Hauksson, 3.10.2009 kl. 23:41]

Það verða allir að virða þá fyrir meiri menn sem hleypa að athugasemdum og andmælum. Ekki þannig að það eigi að umbera hvað sem er, ógrundað og án ábyrgðar, en þeir sem ekki einu sinni umbera andmælendur sem koma fram undir eigin nafni eiga ekkert erindi í lýðræðislega umræðu og við eigum ekki að taka þátt í „umræðu“ þeirra hvort sem við erum sammála þeim eða ósammála.

- Þeir sem telja lýðræðislega og frjálsa umræðu mikilvægustu leið bestu niðurstöðu geta vel staðið saman um það mikilvægasta hugsjónamál lýðræðis þó skoðanir þeirra á öðrum málum séu ólíkar.

- Ég skora á alla að taka vel eftir því hverjir umbera að andmæli komi fram á bloggi þeirra og umræðu og takaekki þátt í umræðu þeirra sem ekki umbera öndverðar skoðanir.  

Ljóst er að Eyþór er einn þeirra sem hefur vel opið fyrir andmæli og alvöru umræðu.  AÐ því leiti er hann meiri samherji minn en andstæðingur.