20 ára afmæli

Fáir spáðu fyrir um fall Berlínarmúrsins og síðar Sovétríkjanna. Ég var reyndar svo heppinn að hafa upplifað austur-Berlín þegar ég fór í leikhópi Þjóðleikhússins undir forystu Brynju Benediktsdóttur 1987 og við lékum í Karl Marx leikhúsinu. Leikritið var "Hvar er hamarinn" eftir Njörð P. Njarðvík og fjallar um baráttu Þórs og Loka. Þessi upplifun í höfuðstað kommúnismans var holl og eftirminnileg. Ég held að Örn Árnason eigi videotökur af ferðinni sem gaman væri að sjá við tækifæri en þar sáum við meðal annars gæsagang hermanna sem gættu "öryggis borgaranna" og upplifðum við ótrúlega hluti sem lifa í minningunni. Eitt af því sem að var áberandi var mikil mengun enda hef ég aldrei skilið hvernig vinstri og grænt eigi samleið. Fáir hafa leikið náttúruna og andrúmsloftið verr en kommúnistaríkin. 

Í dag eru 20 ár síðan múrinn féll og reyndar er líka 20 ár í þessum mánuði frá því að hljómsveitin Todmobile spilaði fyrst opinberlega. Þó Todmobile hafi ekki haft heimssöguleg áhrif þá fannst okkur samt sem áður vera tilefni til að halda upp á afmælið og halda tónleika.

Það er umhugsunarvert að rifja upp á afmælum hvert afmælisbarninu hefur miðað. Hvað varðar Berlínarmúrinn eru enn þó nokkrir sem sakna hans en þrátt fyrir mikla galla á frjálsum markaði eru samt flestir sammála því að hann sé betri en höft og ógnarstjórn. Það er út af fyrir sig sérkennilegt að við séum hér á Fróni með gjaldeyrishöft og ríkisvæðingu á flestum sviðum þegar 20 ára afmælis múrsins er minnst. Vonandi verður gott að búa á Íslandi þegar 20 ára afmæli bankahrunsins verður minnst árið 2028.