2 af hverjum 3 krónum eigin fjár tapast hjá Árborg

Enn hallar á verri veginn í rekstri sveitarfélagsins Árborgar. Við sem skipum minnihlutann höfum bent á að í óefni kunni að fara og því miður er sú raunin. Eigið fé sveitarfélagsins er að verða uppurið þrátt fyrir að hlutabréf í Hitaveitu Suðurnesja hafi verið seld árið 2007. Í dag var lögð fram þriðja fjárhagsáætlun vegna ársins 2009 til samþykktar en mikið hefur breyst frá fyrstu (samþykkt 12. janúar 2009) og líka talsvert frá endurskoðaðri áætlun (samþykkt í maí 2009). Gert er nú ráð fyrir að 2 af hverjum 3 krónum eigin fjár tapist en þó ber að gæta þess að hér er áætlun og 7 vikur eftir af árinu. Eigið fé fer úr 1.007 milljónum niður í 364 milljónir og er augljóst að viðvarandi taprekstur mun brenna það upp á næstu mánuðum að óbreyttu. 

Við lögðum fram eftirfarandi bókun vegna þessarar (þriðju) fjárhagsáætlunar meirihlutans: 

"Nú liggur fyrir önnur endurskoðun fjárhagsáætlunar vegna yfirstandandi árs. Sú fyrsta var samþykkt 12. janúar  síðastliðinn en endurskoðuð áætlun var síðan samþykkt í maí. Frávik frá endurskoðaðri áætlun eru talsverð og þótt tekjur séu áætlaðar um fimmtíu milljónum hærri í fyrirliggjandi endurskoðun er afkoman 118 milljónum lakari nú en talið var í maí. Ef forsendur uppfærðrar fjárhagsáætlunar ganga eftir verður eigið fé komið niður í 364 milljónir í árslok. Í útkomuspá fyrir síðasta ár sem birt var í upphaflegri fjárhagsáætlun fyrir árið 2009 og dagsett er þann 12. janúar er gert ráð fyrir að eigið fé sé 1.904 milljónir um síðustu áramót. Sú reyndist ekki raunin og stóð eigið fé sveitarfélagsins í 1.007 milljónum um síðustu áramót. Nú er gert ráð fyrir að eigið fé bæjarsjóðs fari niður í 364 milljónir í árslok og verður þá komið undir 5%. Lætur því nærri að skuldir og skuldbindingar séu hátt í milljón á íbúa en eigið fé 44 þúsund krónur. Nú bendir flest til áframhaldandi tapreksturs á næsta ári og því stefnir í að eigið fé bæjarsjóðs verði uppurið um mitt næsta ár að óbreyttu. Í nýrri endurskoðaðri fjárhagsáætlun kemur í ljós að handbært fé frá rekstri er neikvætt og er það breyting frá maí áætlunarinnar þegar gert var ráð fyrir 54 milljón króna jákvæðri stöðu. Hér er frávik upp á 92 milljónir á þeim lið sem hvað mikilvægast er að sé jákvæður. Þessi breyting hlýtur að kalla á að tekið sé fullt tillit til þessarar spár í fjárhagsáætlun fyrir árið 2010." Bæjarfulltrúar D-lista.

Athugasemdir

[Sigurjón, 14.11.2009 kl. 15:33]

Sæll Eyþór.

Ég verð að taka undir áhyggjur þínar varðandi efnahagsreikning bæjarins.  Ég segi, sem íbúi á Selfossi, að þetta er algjörlega ótækt.  Ekki kannske að undra þegar vinstri öflin ráða för, en það má vera nokkuð ljóst hvað ég mun láta í kjörkassann í vor.  Ég skora á þig að vera í fararbroddi með Sjálfstæðismönnum og koma með trúverðugar og raunhæfar áætlanir, auk þess að sýna djörfung og hug í kosningaslag vorsins.  Látum ekki íbúa Selfoss sitja uppi með þetta lið lengur í forystunni!

Kveðja, Sigurjón V.