Boris allur

Boris Jeltsín er sjálfsagt einn vanmetnasti stjórnmálamaður sögunnar. Það kann að breytast. Í mínum huga var Gorbasjev hampað um of, enda reyndi hann að viðhalda kommúnisma í Rússlandi og nágrannalöndum þess. Ef Jeltsín hefði ekki notið við væri Rússland sennilega annars flokks Kína og Eystrasaltslöndin væru í fjötrum. Jeltsín þótti kostulegur og vöktu uppátæki hans mikla athygli. Hann var umdeildur fyrir ýmislegt, ekki síst hraðsoðna einkavæðingu sem þótti fara of hratt.

Eitt eru allir sammála um: Hann var hugrakkur maður á réttum tíma.

 

Athugasemdir

[Ólafur Þórðarson, 23.4.2007 kl. 22:15]

Já þeir eru margir sem fóru til Sovét fyrrum til að græða. Ekki fóru Rússar of vel út úr þessari tilraun með að einkavæða. Fyrir utan nokkra gæðinga sem höfðu það jafnvel aðeins betra en hinir flokksgæðingarnir undir rauða fánanum. Auðvitað er þetta allt ákveðinn kommúnismi.
Eitt þykir manni fyndið, sem er hvernig menn rugla saman lýðræðinu og frjálsum markaði, eins og það sé eitt og hið sama.

[Hlynur Jón Michelsen, 24.4.2007 kl. 09:42]

Einkavæðing í Rússlandi er nú ekki svo ólík einkavæðinu í öðru ónefndu landi sem ég ætla ekki að nefna en fyrsti stafurinn í því landi er Ísland...

[Karl F. Thorarensen, 25.4.2007 kl. 16:55]

Sæll Eyþór....  Förum yfir þetta skref fyrir skref:

 

1.  Boris Jeltsín er sjálfsagt einn vanmetnasti stjórnmálamaður sögunnar: 

Í augum flestra Rússa er Jeltsín minnst í heimalandi sínu fyrir nákvæmlega það sem hann var:  Tækifærissinnaður stjórnmálamaður sem hafði því miður mjög takmarkaða þekkingu á málefnum þjóðar sinnar.

 

2.  Í mínum huga var Gorbachev hampað um of, enda reyndi hann að viðhalda kommúnisma í Rússlandi og nágrannalöndum þess: 
Gorbachev reyndi að viðhalda stöðuleika og færa landið úr fjötrum kerfis sem var spillt og rotið.  Það var aldrei neinn kommúnismi í Sovétríkjunum og Gorbachev hafði engan áhuga á því að koma því kerfi á.  Gorbi var og er lýðræðissinnaður vinstri maður.

 

3.  Ef Jeltsín hefði ekki notið við væri Rússland sennilega annars flokks Kína og Eystrasaltslöndin væru í fjötrum: 
Rangt.  Ef Jeltsín hefði ekki bolað Gorba út og Perestroika og Glasnost stefna Gorba hefði fengið meiri tíma til að sanna sig væru Eystrasaltslöndin í nákvæmlega sömu stöðu og þau eru í dag.  Eini munurinn væri að löndin þrjú ættu örugglega betri samskipti við Moskvu.  En utan Sovétríkjanna væru þau. 

Annars flokks Kína?  Efnahagslega kannski.  Mannréttindalega séð?  Sovétríkin stæðu þeim langt um framar ef öllu hefði ekki verið kastað fyrir róða 1991.

 

4.  Jeltsín þótti kostulegur og vöktu uppátæki hans mikla athygli: 
Jú, ein leið til að útskýra hvernig hann gerði Rússland að aðhlátursefni heimsins.

 

5.  Hann var umdeildur fyrir ýmislegt, ekki síst hraðsoðna einkavæðingu sem þótti fara of hratt: 
Ekki einu sinni Igor Gaidar eða Anatoly Chubais eða aðrir sem stóðu að þessari “einkavæðingu” myndu orða þann skrípaleik svo hátíðlega nú á tímum.

 

6.  Eitt eru allir sammála um: Hann var hugrakkur maður á réttum tíma: 
Rangt.  Hann var einn kræfasti populisti sögunnar sem var uppi á kolröngum tíma.  Hann ber ábyrgð á sprengjuárásum á þinghúsið, stríðinu við Tétséna og fátækt og niðurlægingu Rússlands.  Þannig er það bara.  Því miður.

 

Bestu kveðjur,

 

Karl F. Th.