Hriktir í bankakerfi BNA

Frétt dagsins á Wall Street var án efa fall Bear Stearns og sértækar aðgerðir Seðlabanka BNA til að reyna að bjarga bankanum. Það eru aðeins nokkrir dagar síðan yfirmenn Bear Stearns fullyrtu að þeir glímdu við engan lausafjárvanda. Núna segja margir að bankinn verði ekki til um áramót í óbreyttri mynd...

Bear market anyone?

Athugasemdir

[Georg P Sveinbjörnsson, 15.3.2008 kl. 02:20]

Þurfa eigendur Íslenskra banka að hafa nokkrar áhyggjur, almenningur verður látinn redda þeim og borga björgunina þegar/ef að kemur, sama hversu launaþræla landsins munu þá mögla, hafandi ekki gleymt flottræfilshættinum og ofurlaununum á undanförnum árum...að maður tali ekki um alla sílspikuðu starfslokasamningana.

[Þórir Kjartansson, 15.3.2008 kl. 15:05]

Það er vonandi meira að marka okkar bankamenn, sem berja sér á brjóst og segja allt í himnalagi. Og ef eitthvað fer úrskeiðis væri það auðvitað einhverjum vitlausum útlendingum að kenna.

[G. Tómas Gunnarsson, 15.3.2008 kl. 17:25]

Eins og einn kunningi minn sagði við mig í gær:  "We have to hope for the best, but this could be the beginning of a very ste(a)rn bear market."

[Hagbarður, 15.3.2008 kl. 21:26]

Viðhorfin virðast samt vera að taka breytingum ef marka má umfjallanir á erlendum mörkuðum á fimmtudag og föstudag, þó að þessar fréttir með Bearn Stearns hafi virkað mjög neikvætt. Menn telja að farið sé að rofa til og tíminn, þrír til sex mánuðir, líklegir til að hleypa "sullinu" af efnahagreikningum bankanna. Það er það sem nýjast er í þessu og vekur vonir að "óveðrinu" fari að slota. Engar svona fréttir, þ.e. jákvæðar fréttir í neikvæðu umhverfi hafa verið síðan í október á síðasta ári. Áætluð afskriftarþörf er núna talin vera 150 til 200 milljarðar til viðbótar og kemur líklega að mestu fram á Q1 og Q2 þessa árs.

Á föstudaginn boðaði Beranke breytingar við gerð og útgáfu fasteignalána og meðferð þeirra í skuldabréfavafningum. Ég held að það verði til bóta þegar fram líða stundir og gerir þennan hluta viðskiptanna sýnilegri og áræðanlegri. Kohl reyndi að tala markaðinn upp og á sama tíma jók FED innspýtingu um 200 milljarða $. Að miklu leyti snýst þetta um viðhorf. Óttinn hvar ´"súru eplin" er hefur einkennt markaðinn og mikið af fjármagninu því legið á hliðarlínunni. Neikvæðar fréttir hafa virkað mun meira á markaðinn en jákvæðar fréttir sem varla hreyfa hann.

Margir eru þeirrar skoðunar að eftir mitt árið fari að rofa til. Þá verði megnið af "sullinu" farið í gegn (að því gefnu að ekki verði alsherjar kreppa og gjaldfelld húsnæðislán haldi áfram að fóðra kerfið) og útflutningsfyrirtæki komi mörg hver til með að sýna góða afkomu á árinu vegna lágs gengis $. Spáð er mjög kröftugum hlutabréfamarkaði í BNA á síðari hluta ársins. Virði margra félaga er lágt í sögulegu samhengi og hugsanlega eiga eftir að skila sér inn á hlutabréfamarkaðinn "Petro Dollarar" frá Arabalöndunum og eitthvað af hinum risavaxna gjaldeyrisforða Kínverja.

Ég hef ekki trú á því að það verði "fjölda gjaldþrot" í fjármálakerfinu almennt. Ég held að menn reyni að verjast því eins og kostur er. Það myndi haf mjög neikvæð áhrif og valda ófyrirséðu tjóni í heimsviðskiptum. Northern Rock er dæmi um inngrip sem má réttlæta með því að verið er að reyna að halda upp tiltrú. Sama er með Bearn Stearns. Það sem ég hef frekar áhyggjur af er að hugsanlega eiga eftir að verða langvarandi málaferli vegna þessarar undirmálskrísu sem getur sett mark sitt á virði BNA fjármálafyrirtækja á næstu árum.