Passíusálmar séra Hallgríms

Ég mæli með lestri Passíusálmanna fyrir trúaða sem vantrú-aða. Séra Gunnar Björnsson í Selfosskirkju hefur haft veg og vanda að árlegum lestri þessara lykilsálma íslenskrar tungu á Föstudaginn langa ár hvert. Nú í ár fékk að vera með sem lesari og fékk í minn hlut 8.  - 10. sálminn, en margir góðir lesarar voru í dag svo sem eins og Árni Valdimarsson, Ólafur Helgi sýslumaður og svo Séra Gunnar sjálfur.

Læt 9. sálminn fylgja í tilefni dagsins:

9. sálmur: Um flótta lærisveinanna

1

Þá lærisveinarnir sáu þar

sinn herra gripinn höndum

og hann af fólki verstu var

vægðarlaust reyrður böndum,

allir senn honum flýðu frá,

forlétu drottin hreinan

í háska einan.

Að svoddan skulum við, sál mín, gá.

Sjáum hér lærdóm beinan.

 

2

Án drottins ráða er aðstoð manns

í öngu minnsta gildi.

Fánýtt reynist oft fylgið hans,

sem frekast hjálpa skyldi.

Hver einn vill bjarga sjálfum sér,

ef sýnist háskinn búinn

að hendi snúinn.

Far því varlega, að fallvölt er

frænda og vina trúin.

 

3

Í sama máta sér þú hér,

sál mín, í spegli hreinum,

að hryggilegar sé háttað þér

en herrans lærisveinum.

Þeir höfðu leyfi lausnarans

lífi að forða sínu

frá sárri pínu,

nauðugir misstu návist hans.

Nú gæt að ráði þínu.

 

4

Hvað oft, Jesú, þér flúði eg frá

frekt á mót vilja þínum,

þá glæpaveginn gekk ég á,

girndum fylgjandi mínum?

Forskuldað hafði eg fyrir það

flóttamaður að heita

til heljar reita.

En þú virtist mér aumum að

aftur í miskunn leita.

 

5

Einn varstu, Jesú, eftir því

í óvina látinn höndum,

einn svo ég væri aldrei í

eymd og freistingum vöndum.

Allir forlétu einan þig,

allt svo mig hugga kynni

í mannraun minni.

Ég bið: Drottinn, lát aldrei mig

einsamlan nokkru sinni.

 

6

Lærisvein, sál mín, sjá þú þann,

sem Jesú eftir fylgdi.

Ranglát ungmenni ræntu hann,

rétt nakinn við þá skildi.

Bersnöggur flótti betri er

en bræðralag óréttinda

í selskap synda.

Ávinning lát þig öngvan hér

í þeirra flokki binda.

 

7

Burt þaðan Jesúm færði fljótt

flokkur illræðismanna.

Lamb guðs saklaust, þá leið að nótt,

leiddu þeir til kvalanna.

Miskunnarlaus sú meðferð bráð

mér virðist eftir vonum;

í náttmyrkrunum

þeir hafa bæði hrakt og hrjáð,

hrundið og þrúgað honum.

 

8

Í dauðans myrkrum ég, dæmdur þræll,

dragast átti til pínu,

en þú tókst, Jesú, son guðs sæll,

saklaus við straffi mínu.

Þanninn til bjóstu ljóssins leið

ljómandi sálu minni,

þó líf hér linni.

Andlátskvölum og kaldri neyð

kvíði eg því öngu sinni.

 

9

Hröktu því svo og hrjáðu þig,

herra minn, illskuþjóðir,

hér svo nú bæru á höndum mig

heilagir englar góðir.

Mæðusöm urðu myrkrin þér,

mæta létu þig hörðu

og hindran gjörðu,

guðs dýrðar ljós svo lýsi mér

á lifandi manna jörðu.

 

10

Kvalaför, Jesú, þessi þín,

sem þá gekkstu einu sinni,

veri kraftur og verndin mín,

svo veginn lífsins ég finni.

Lát ekki djöful draga mig

í dofinleik holdsins blinda

til sekta og synda.

Ég bið af ást og alúð þig

ákefð hans burt að hrinda.

Vantrúaðir spila bingó

Athugasemdir

[Vendetta, 21.3.2008 kl. 19:33]

Æi, nei, Eyþór, ekki passíusálmarnir, þeir eru svo leiðinlegir. Alveg eins og Hallgrímur var sjálfur að sögn Tyrkja-Guddu. Enda var hún fegnust því að vera numin á brott.

Í dag, Föstudaginn langa eiga allir að skemmta sér og eiga sér glaðan dag með alls konar orgíum. Maður lifir bara einu sinni.

Og megi Eastre, páskagyðja vors og frjósemis veita þér hamingjusaman dag, Eyþór minn.

[Anna Benkovic Mikaelsdóttir, 21.3.2008 kl. 22:30]

já...það var afslappandi í dag og huggulegt að spila Bingó við Austurvöll.  Hef eytt mörgum fínum árum í að hlusta á passíusarsálmana og heilagar kaþólskar messur á þessum degi...en best hingað til og hiklaust mest afslappað...bingó!

[DoctorE (IP-tala skráð) 25.3.2008 kl. 14:25]

Þessir sálmar eru pain