50 tonn af páskaeggjum

Meðalþyngd íslenskra karla var 79,4 kg árið 1968 en var komin upp í 87,9 kg árið 1998. Gætum verið komin yfir 90 kg í dag miðað við þetta. Ég þekki það á eigin skinni að aukakílóin sækjast í selskap hvert við annað. Það er kannski illa gert að vera að minna á þessa þróun daginn áður landsmenn torga kannski 50 tonnum af súkkulagðieggjum, en einhvernveginn kom þetta upp í hugann í morgun.

Í dag eru lífslíkur Íslendinga meiri en flestra annara og eru nú svo komið að íslenskir karlmenn eru í fyrsta sinn manna líklegastir til að ná hárri elli og nálgast 80 ár að jafnaði. Margir eru á því að mesta heilbrigðisógn 21. aldarinnar sé offita. Það er því ekkert að því að kaupa aðeins minna páskaegg, enda er 1 málsháttur í hverju eggi, enda skiptir stærðin ekki máli í þeim efnum.

Gestaþáttur Hávamála fjallar um átið þótt minna hafi verið um offitu á þeim tímum:

Gráðugur halur,
nema geðs viti,
etur sér aldurtrega.
Oft fær hlægis
er með horskum kemur
manni heimskum magi.

Hjarðir það vitu
nær þær heim skulu
og ganga þá af grasi.
En ósvinnur maður
kann ævagi
síns um mál maga.

Athugasemdir

[Tómas Þóroddsson, 7.4.2007 kl. 10:51]

Stalst til að opna mitt og fékk málsháttinn "fellur lauf að hausti og stjórn að vori"

[Gunnlaugur Þór Briem, 7.4.2007 kl. 11:12]

Stalst til að opna mitt, ósvinnur sem ég er, en háttatal var núll. Eggið var málsháttarvana! Nói Síríus skal fá orð í eyra fyrir þetta.