Velheppnuð stund í Selfosskirkju

Í dag voru lesnir Passíusálmarnir víða, en það er að verða árviss hefð í Selfosskirkju hjá séra Gunnari Björnssyni. Lesarar voru 17 talsins úr ýmsum starfsgreinum úr sókninni. Hallgrímur Pétursson er í hópi þeirra sem mest hafa mótað íslenskt mál og haft mikil áhrif á þúsundir Íslendinga frá blautu barnsbeini með kvæðum sínum.

Það er rétt að enda daginn á síðasta og 13. erindi 50. sálmsins:

Ég lifi í Jesú nafni,
í Jesú nafni eg dey.
Þó heilsa og líf mér hafni,
hræðist ég dauðann ei.

Dauði, ég óttast eigi
afl þitt né valdið gilt.
Í Kristí krafti eg segi:
Kom þú sæll, þá þú vilt.

Passíusálmar lesnir víða um land

Athugasemdir

[Stefán Einar Stefánsson (IP-tala skráð) 7.4.2007 kl. 09:51]

Blessaður og sæll Eyþór. Ég þakka þér fyrir ágæt skrif um Hallgrím Pétursson. Þó vil ég koma að leiðréttingu varðandi þessa síðustu færslu þína. Það erindi sem þú vísar í hér að ofan tilheyrir ekki Passíusálmunum 50 heldur sálminum "Um dauðans óvissa tíma". Misskilningurinn hlýtur að liggja í því að sálmurinn er oftast prentaður beint á eftir sálmunum. Síðasta erindi þeirra er:

Dýrð, vald, virðing og vegsemd hæst,
vizka, makt, speki og lofgjörð stærst
sé þér, ó, Jesú, herra hár,
og heiður klár.
Amen, amen, um eilíf ár.

[Eyþór Laxdal Arnalds, 7.4.2007 kl. 09:56]

Þakka athugsemdina Stefán rétt skal vera rétt. Gleðilega páska.