Þurfum við svona mörg ráðhús?

Ekki veit ég hvað mörg ráðhús eru á Íslandi en þeim hefur fjölgað ört á síðustu árum. Bæjarstjórar hafa verið á góðum launum og fjölmargir starfa við stjórnun. Þegar nú er hart í ári þurfum við að skoða hvar við getum sparað án þess að það bitni á þeirri þjónustu sem raunverulega er veitt. Sameiningar sveitarfélaga eru ein leið, samvinna önnur og svo þurfum við öll að endurskoða hvað við erum að leggja mikið í yfirstjórn.

D-listinn í Árborg leggur til eftirfarandi:

a) Auglýst verði eftir bæjarstjóra á lægri launum en verið hefur
b) Bæjarfulltrúum verði fækkað úr 9 í 7
c) Boðleiðir verði styttar
d) Allir bæjarfulltrúar fái hlutverk hvort sem þeir eru í "minnihluta" eða "meirihluta"

Með þessu viljum við sýna gott fordæmi í verki. Með því að taka til í okkar nánasta umhverfi getum við betur virkjað aðra.

Ég er viss um það að þetta má skoða í öllum sveitarfélögum.

Athugasemdir

[Heimir Tómasson, 25.5.2010 kl. 14:06]

Eyþór minn, biddu fyrir þér. Forréttindastéttin sem er við völd núna mun aldrei taka nokkuð svona í mál. Sumir bæjarfulltrúar (vil ekki nefna nein nöfn hérna) líta á það sem sína heilögu skyldu að halda Status Quo, sama hvað á dynur. Og ef það þarf að setja upp húsnæði fyrir eigin atvinnurekstur... þá er það gert í öðrum hrepp, svo skattpíningin eigi ekki við þá.

Ógeðfellt í meira lagi, segi ég bara.

[Ragnar Geir Brynjólfsson, 25.5.2010 kl. 22:45]

Þetta eru ágætar tillögur. Sparnaðurinn hlýtur að byrja hjá bæjarstjórninni sjálfri. Níu bæjarfulltrúar er orðið nokkuð stórt ráð og fundir ættu að ganga betur fyrir sig hjá sjö manna ráði.

[Sumarliði Einar Daðason, 26.5.2010 kl. 17:44]

Ég er sammála þér í þessari grein. Það er fyrir löngu kominn tími á að skera niður fitu þessa lands. Fækkun ráðhúsa er góð byrjun!