Passíusálmar séra Hallgríms

Ég mæli með lestri Passíusálmanna fyrir trúaða sem vantrú-aða. Séra Gunnar Björnsson í Selfosskirkju hefur haft veg og vanda að árlegum lestri þessara lykilsálma íslenskrar tungu á Föstudaginn langa ár hvert. Nú í ár fékk að vera með sem lesari og fékk í minn hlut 8.  - 10. sálminn, en margir góðir lesarar voru í dag svo sem eins og Árni Valdimarsson, Ólafur Helgi sýslumaður og svo Séra Gunnar sjálfur.

Læt 9. sálminn fylgja í tilefni dagsins:

9. sálmur: Um flótta lærisveinanna

1

Þá lærisveinarnir sáu þar

sinn herra gripinn höndum

og hann af fólki verstu var

vægðarlaust reyrður böndum,

allir senn honum flýðu frá,

forlétu drottin hreinan

í háska einan.

Að svoddan skulum við, sál mín, gá.

Sjáum hér lærdóm beinan.

 

2

Án drottins ráða er aðstoð manns

í öngu minnsta gildi.

Fánýtt reynist oft fylgið hans,

sem frekast hjálpa skyldi.

Hver einn vill bjarga sjálfum sér,

ef sýnist háskinn búinn

að hendi snúinn.

Far því varlega, að fallvölt er

frænda og vina trúin.

 

3

Í sama máta sér þú hér,

sál mín, í spegli hreinum,

að hryggilegar sé háttað þér

en herrans lærisveinum.

Þeir höfðu leyfi lausnarans

lífi að forða sínu

frá sárri pínu,

nauðugir misstu návist hans.

Nú gæt að ráði þínu.

 

4

Hvað oft, Jesú, þér flúði eg frá

frekt á mót vilja þínum,

þá glæpaveginn gekk ég á,

girndum fylgjandi mínum?

Forskuldað hafði eg fyrir það

flóttamaður að heita

til heljar reita.

En þú virtist mér aumum að

aftur í miskunn leita.

 

5

Einn varstu, Jesú, eftir því

í óvina látinn höndum,

einn svo ég væri aldrei í

eymd og freistingum vöndum.

Allir forlétu einan þig,

allt svo mig hugga kynni

í mannraun minni.

Ég bið: Drottinn, lát aldrei mig

einsamlan nokkru sinni.

 

6

Lærisvein, sál mín, sjá þú þann,

sem Jesú eftir fylgdi.

Ranglát ungmenni ræntu hann,

rétt nakinn við þá skildi.

Bersnöggur flótti betri er

en bræðralag óréttinda

í selskap synda.

Ávinning lát þig öngvan hér

í þeirra flokki binda.

 

7

Burt þaðan Jesúm færði fljótt

flokkur illræðismanna.

Lamb guðs saklaust, þá leið að nótt,

leiddu þeir til kvalanna.

Miskunnarlaus sú meðferð bráð

mér virðist eftir vonum;

í náttmyrkrunum

þeir hafa bæði hrakt og hrjáð,

hrundið og þrúgað honum.

 

8

Í dauðans myrkrum ég, dæmdur þræll,

dragast átti til pínu,

en þú tókst, Jesú, son guðs sæll,

saklaus við straffi mínu.

Þanninn til bjóstu ljóssins leið

ljómandi sálu minni,

þó líf hér linni.

Andlátskvölum og kaldri neyð

kvíði eg því öngu sinni.

 

9

Hröktu því svo og hrjáðu þig,

herra minn, illskuþjóðir,

hér svo nú bæru á höndum mig

heilagir englar góðir.

Mæðusöm urðu myrkrin þér,

mæta létu þig hörðu

og hindran gjörðu,

guðs dýrðar ljós svo lýsi mér

á lifandi manna jörðu.

 

10

Kvalaför, Jesú, þessi þín,

sem þá gekkstu einu sinni,

veri kraftur og verndin mín,

svo veginn lífsins ég finni.

Lát ekki djöful draga mig

í dofinleik holdsins blinda

til sekta og synda.

Ég bið af ást og alúð þig

ákefð hans burt að hrinda.

Vantrúaðir spila bingó

CCTV á RÚVTV

Sá í kvöld myndskeið frá ríkssjónvarpi Kína þar sem yfirvöld telja sig sanna sekt Tíbeta í Tíbet.

Ríkissjónvarpið í Kína heitir "China Central Television" skammstafað CCTV.
Þar er boðið upp á ýmsar sjónvarpsrásir eins og CCTV1, CCTV2, CCTV3 og fleiri.

CCTV er skammstöfun á vesturlöndum og merkir "Closed Circuit TV" eða eftirlitsmyndavélakerfi á venjulegri íslensku.

Tilviljun eða hvað?

Kína, ríkiskapítalisminn og Peking 2008

Í Kína stjórnar einn flokkur: Kommúnistaflokkurinn

Í Kína eru sjálfstæð verkalýðsfélög bönnuð

Hvernig er það var ekki kommúnisminn upphaflega hugsaður fyrir verkafólk?

Kína hefur lækkað framleiðslukostnað fyrir okkur vesturlandabúa. Því hafa menn fagnað og reyndar líka bölvað eins og við er að búast. Nú eru kínverskir neytendur og framleiðendur að valda hækkunum á hrávörum. Farnir að keyra bíla, borða talsvert hveiti og nota mikið af málmum. Allt er þetta gert með miðstýringu ríkisins og veldur titringi á heimsmarkaði. Ríkisrekstur Kína beitir kapítalískum aðferðum þótt allar ákvarðanir séu teknar miðlægt.
Þetta er ríkiskapítalismi og hann er í miklum vexti í heiminum í dag.

Kína er farið að hafa áhrif á okkar líf. Og nú vill Kína sýna sitt besta andlit og heldur glæsilega Olympíuleika í Peking. Þetta höfum við séð fyrr hjá þeim þjóðum sem vilja bæta umdeilda ímynd sýna. Sumir segja þetta aðeins íþróttaviðburð, en margt bendir til þess að Kínverjar sjálfir líti á þetta sem annað og meira.

Umdeildir Olympíuleikar eru engin nýlunda; Berlín 1936 og Moskva 1980 voru umdeildir viðburðir.

Nú láta Tíbetar í sér heyra (og Kínverjar loka á Youtube)

Hvernig verður Peking 2008 minnst?

Undirstöðuatriði

Síðustu ár hafa einkennst af mikilli þenslu og miklu flugi á fólki og fyrirtækjum. Og svo má ekki gleyma opinberum aðilum sem hafa ekki látið sitt eftir liggja í "góðum og spennandi" verkefnum.

Helsti drifkrafturinn á Íslandi hefur verið fólginn í fjárfestingum sem fjármagnaðar hafa verið með lánum. Þetta eru nú flestir sammála um. Virkjanirnar eru hlutfallslega smáar í sniðum miðað við stóru skuldsettu yfirtökurnar sem "útrásin" stóð að. Þessar yfirtökur hafa skapað störf, tekjur og hagnað um hríð, en nú er öldin önnur og hægt hefur á.

Hátt gengi krónu hefur gefir öllum sem vildu tækifæri til að fá ódýrt erlent lánsfé og  mikinn kaupmátt heima fyrir. Nú er þetta breytt.  

Á sama tíma varð sífellt erfiðara fyrir útflutningsgreinarnar sem í reynd afla þjóðabúinu gjaldeyris vegna tekna, en ekki lána. Nú hefur þetta snúist við.

Undirstöður atvinnulífsins hafa því breyst þannig að nú eru framleiðslu og útflutningsgreinarnar aftur orðnar lykilatriði fyrir þjóðarbúið. Án þeirra værum við í enn erfiðari stöðu.

Fiskur, orka, ál, kísill og tækni.

Osama sakar ESB og Páfann um krossferð (með dönsku teikningunum..)

Osama bin Laden hélt upp á fimm ára afmæli innrásarinnar í Írak með segulbandslestri. Þar hótar hann Evrópusambandinu sérstaklega vegna danskra teikninga af Múhameð spámanni.

Þá sagði bin Laden að dönsku teikningarnar væru hluti af krossferð sem Benedikt páfi væri ábyrgur fyrir.

Ég sem hélt að þetta væri allt saman Bush að kenna?

 

McCain yfir Obama (og Clinton)...

Fyrir stuttu var Obama með talsvert forskot á McCain í könnunum, en vika er langur tími í pólítík. Nú hefur prófkjör Demókrata dregist á langinn og ávirðingar farnar að vaxa á millum frambjóðenda. Þetta líkar kjósendum miður og nú hafa tölurnar snúist við samkvæmt Reuter og er McCain með mikið forskot hjá óháðum (óskráðum) kjósendum:

Fyrir nokkrum vikum voru heildartölurnar þessar:

Obama 47 

McCain 40

Núna:

Obama 40

McCain 46 

http://www.reuters.com/article/politicsNews/idUSN1824791220080319 feedType=RSS&feedName=politicsNews&rpc=22&sp=true

Skiptimynt

Í morgun var Síminn skráður á markað í annað sinn á þeim 100 árum sem hann hefur starfað. Eignarhaldsfélag Símans; Skipti hf. er skráningarfélagið og voru bréf í því félagi boðin fagfjárfestum fyrir stuttu. Nú berast þær fréttir að stjórn Exista muni leggja fram yfirtökutilboð í hluti Skipta. Ef þetta er rétt stoppar Síminn stutt við á markaði í þetta "skiptið".

Vodafone verður þá aftur eina skráða fjarskiptifyrirtækið á markaði!

Greitt verður með bréfum í Exista og er því um aukningu hlutafjár í Exista að ræða ef af þessu verður.

Það eru þá stærstu hluthafar Skipta hf. sem skipta bréfum í Skiptum í skiptum fyrir bréf í Existu.

Exista vill yfirtaka Skipti

Jafnrétti í sundi

Eins og menn (konur eru líka menn) vita má ekki mismuna fólki eftir kyni. Það er samt sem áður gert t.d. varðandi baðfatnað kynjanna.

Fróðlegt er að fylgjast með þessari jafnréttisbaráttu hjá sænsku baráttukonunum eins og lesa má um hér

Þarf ekki að setja um þetta lög Kolbrún?

Bannað að bera brjóstin í Hveró

Er verðbólgan rétt mæld?

Verðbólgan er mikil á Íslandi um þessar mundir, en verðbólgan er mæld sem meðaltal síðust 12 mánaða. Það sem er sérstakt eins menn vita er að húsnæðisverð er tekið með í reikninginn. Þetta hefur aukið á mælda verðbólgu síðustu ár, en ef notuð er mælistika ESB eða USA er verðbólga á Ísalndi lág.

Nú er það hins vegar að gerast að verðbólguþættir þeir sem ekki heyra til húsnæðisverðs eru í sókn. Hrávara hækkar matvöru. Olía hækkar bensín. Verðbólgan hækkar ört nú vegna þessa og svo er krónan að snarlækka.

Ef verðbólgan væri mæld eins og víða annars staðar væri hún eins og áður sagði mun lægri. Skiptir þetta máli? Já svo sannarlega. Bæði hefur þetta áhrif á verðtryggð lán sem hækka í takt við vísitöluna og svo er það hitt að það er afar erfitt fyrir Seðlabankann að lækka vexti þegar verðbólgutölurnar eru svona háar.

Þá er spurning hvort ekki megi leiðrétta þessa mælistiku verðbólgunnar í átt að alþjóðlegum stöðlum?

Og eða hitt; að víkka út markmið Seðlabankans svo hann þurfi ekki að einbeita sér eingöngu að verðbólgumarkmiðinu?

 

Ekki gera ekki neitt..

Seðlabankar víða um heim lækka nú vexti. Sérstaklega sá stóri. Bretar hafa þjóðnýtt stóran banka og ríkisstjórnir hafa aukið peningamagn til fjármálastofnanna. 

Á Íslandi höfum við haldið okkur enn um sinn við háa vexti, enda verðbólgan mikil. Eins og víða eru Íslendingar milli steins verðbólgunnar og sleggju fjármálakreppunnar. 

Ríkisstjórnin mun ekki aðhafast neitt að svo stöddu, en ljóst er að olíufélögin munu hafa nóg að gera við að hækka bensínverð. 

Einhvern vegin komu mér í hug einkunnarorð Intrum á Íslandi, en líklegt er að það sé í miklum vexti á næstu mánuðum; "ekki gera ekki neitt" segja þeir við þá sem eru í fjárhagskröggum. 

Ráð Intrum eru að skuldarar geri eitthvað. Hvað gera bændur nú?

(Rétt er að geta heimilda smbr. dóm Hæstaréttar 

Heimild: www.ekkigeraekkineitt.is)

Ég er stoltari af Björk

Óöldin í Tíbet fer vaxandi og hafa friðsamleg mótmæli breyst í vísi að uppreisn gegn alræðisstjórn Kínverja í Tíbet. Dalai Lama reynir að róa ofbeldisþróunina frá Indlandi, en óvíst er hvernig þetta fer.

Það rifjast upp fyrir Olympíuleikana í Peking hvaða lönd eru með lýðræði og hver ekki. Indland er stórt lýðræðisríki við hlið hins stóra Kína sem stjórnað er af einum flokki; Kommúnistaflokknum.

Staða Tíbet hefur verið í sviðsljósinu, ekki síst síðan Björk tileinkaði Tíbetum lagið "Declare Independence" á tónleikum í Sjanghæ.

Þá hefur möguleg umsókn Tævana í Sameinuðu Þjóðirnar vakið athygli, en haft er eftir utanríkisráðherra okkar Ingibjörgu Sólrúnu í kínverskum fjölmiðlum að Ísland styðji ekki þjóðaratkvæðagreiðslu um hvort Tævan ætti að sækja um aðild að SÞ.

Ég vissi ekki að Ísland væri á móti þjóðaratkvæðagreiðslum annara þjóða. Eða á móti umsóknum til Sameinuðu Þjóðanna. Ég er ekki stoltur af þessari yfirlýsingu sem vonandi er eitthvað afbökuð af ríkisfjölmiðlum í Kína.

Ég er stoltari af Björk.

Náttúruauðlindir - gengi félaga í kauphöll frá áramótum

Á stuttum tíma hefur matur, orka, málmar og önnur hrávara skákað bönkum og yfirtökufélögum sem uppspretta auðs. Skortur á hráefnum er ein helsta ástæðan, enda fer saman minna framboð og stóraukin eftirspurn, ekki síst frá Asíu.

Ísland á miklar náttúruauðlindir, ekki síst orku, fisk og svo náttúruna sjálfa. Þetta er mikilvægur styrkur þegar nú hriktir í fjármálakerfum heimsins. Þennan grunn hafa ekki allar þjóðir. Skynsamleg nýting náttúruauðlinda í strjálbýlulandi er okkar spil á hendi.

Sumir ganga svo langt að segja það skyldu okkar að nýta endurnýjanlega orku okkar sem allra mest og segja sem svo að hún valdi ekki gróðurhúsalofttegundum og fari annars "til spillis" - eða renni til sjávar.

Best er þó að við nýtum orkulindirnar þannig að þær skerðist sem minnst, náttúran fái að njóta sín og fjölbreyttur iðnaður verði til.

Á endanum viljum við virkja hugvitið, enda er mannauðurinn títtnefndur mesta auðlind hverrar þjóðar. Grunnurinn sem við höfum; orkan, fiskurinn og náttúran er einstakur grundvöllur sem við getum byggt okkar sérstöðu á. - Auk bankanna og fjármálafyrirtækjanna.

Það er merkilegt að skoða þau fyrirtæki sem skráð eru á markað á Íslandi. Fjármálafyrirtækin eru mjög dóminerandi og eru framleiðslufyrirtækin fá. Century Aluminum er bandarískt félag sem er einnig skráð á markað hérlendis. Það framleiðir ál í BNA og á Íslandi og hyggur á nýtt álver í Helguvík.

Það er merkilegt að skoða breytingar á gengi hlutabréfa síðustu vikur þar hefur allt lækkað utan eitt frá áramótum.

Þetta segir ákveðna sögu:

 

Hækkanir á árinu

Heiti félagsGengiBreyting

Century Aluminum Company	4.800		1.450	(43,28%)

Lækkanir á árinu

Heiti félagsGengiBreyting

SPRON hf.	5,01		4,05	(44,70%)
FL Group hf.	8,30		6,20	(42,76%)
Icelandic Group hf.	3,00		2,15	(41,75%)
Exista hf.	11,63		8,12	(41,11%)
365 hf	1,38		0,73	(34,60%)
Bakkavör Group hf.	39,0		19,0	(32,76%)
P/F Atlantic Petroleum	1.450		585	(28,75%)
Atorka Group hf.	7,29		2,59	(26,21%)
Straumur-Burðarás	11,17		3,93	(26,03%)
Glitnir banki hf.	16,85		5,10	(23,23%)
Landsbanki Íslands	28,2		7,2	(20,34%)
Hf. Eimskipafélag Íslands	28,0		6,7	(19,31%)
Kaupthing Bank	714		166	(18,86%)
Teymi hf.	4,95		1,02	(17,09%)
Atlantic Airways P/F	197,00		34,50	(14,90%)
Marel Food Systems hf.	88,2		13,8	(13,53%)
Føroya Banki P/F	150,0		22,0	(12,79%)
Össur hf.	88,5		10,0	(10,15%)
Icelandair Group hf.	24,80		2,80	(10,14%)
Alfesca hf.	6,76		0,15	(2,17%)

Hriktir í bankakerfi BNA

Frétt dagsins á Wall Street var án efa fall Bear Stearns og sértækar aðgerðir Seðlabanka BNA til að reyna að bjarga bankanum. Það eru aðeins nokkrir dagar síðan yfirmenn Bear Stearns fullyrtu að þeir glímdu við engan lausafjárvanda. Núna segja margir að bankinn verði ekki til um áramót í óbreyttri mynd...

Bear market anyone?

Til hamingju Sunnlendingar - til hamingjar Íslendingar

Landþráðu marki er náð. Þetta er stærsta framfaraspor á Suðurlandi í marga áratugi. Allir þeir sem hafa komið að þessu verki eiga miklar þakkir skyldar.

Tvöföldun hefst 2009

Jenið hefur hækkað um 40% frá því í fyrra.

Jæja þá er bandaríkjadalurinn kominn í 70 krónur. Á sama degi er jenið að verma 70 aura og krónan orðin lægri en eitt evrusent.

Reyndar er japanska jenið hástökkvari ársins. Þessi lágvaxtamynt er að hækka hratt, ekki síst á móti hávaxtamyntunum. Jenið kostaði 50 aura í júlí í fyrra en kostar nú í dag 70 aura. Hefur því hækkað um 40%.

Eignir í jenum hafa því hækkað mikið í krónum talið.
Sama er því miður að segja um lán í jenum. - Þau hafa stórhækkað þegar menn telja þau nú í íslenskum krónum.

Boom, gloom and doom?

Gaman að Jim Rogers og Marc Faber þessa daganna. Í öllum bölmóðnum ljóma þessir kappar, enda engu líkara en allt það sem þeir hafa spáð sé að rætast. Vonandi verður það ekki.

Mæli samt með þessu frá Marc Faber en hann er með gloomboomdoom.com síðuna sína með óborganlegum myndskreytingum.

Jim Rogers þekkja margir frá bókum hans eins og investment biker og svo þegar hann kom hér á heimsferð sinni og keypti í íslenskum fyrirtækjum um síðustu aldamót.

Hér er dæmi um boðskapinn frá honum þessa daganna, en hann spáði réttilega árið 1999 að hrávörur myndu taka flugið. Allir eru sammála um að það hefur ræst.

Nú er að sjá hvort að doom taki við af boom og gloom . . . .!

karlmennogkrabbamein.is

Gott og tímabært átak að vekja athygli á krabbameinum þeim sem leggjast á karlmenn. Krabbameinsfélagið hefur verið frumherji á heimsvísu í baráttunni við þögla óvininn og er ekki síst þakkarvert sem gert hefur verið í reykingavarnamálum og svo krabbameinum kvenna svo sem í brjóstum. Ég man vel þegar við Geir Þorsteinsson, Ari Matthíason og Andrés Magnússon vorum að berjast gegn reykingum í Hagaskóla. Það fól meðal annars í sér baráttu okkar við heimilisfólk sem reykti.

Við karlmenn erum ekki nógu duglegir að fara til læknis og förum oft of seint. Stundum viljum við vera "frískir og harðir" og "hörkum þetta af okkur". Staðreyndin er samt sú að það harkar enginn af sér krabbamein, en það getur skipt sköpum ef það finnst í tæka tíð.

Krabbamein í eistum og blöðruhálskirtli voru lengi vel feimnismál. Ég man vel eftir því þegar Andy Grove fv. forstjóri Intel braut þagnarmúrinn og lýsti baráttu sinni við krabba í blöðruhálskirtli. Það vakti marga til umhugsunar.

www.karlmennogkrabbamein.is er í anda gömlu reykingarverkefna fyrri ára. Fræðandi og skemmtilegt um leið.

Tökum vel undir með þessum þarfa boðskap.

Sjálfstæðispönk Bjarkar: Grænland, Kosovo og nú Tíbet -(rafmagnað myndband...)

Declare Independence vakti athygli þegar hún hvatti Grænlendinga til dáða og eggjaði þá áfram til sjálfstæðis. Þá var það ekki minna þegar Kosovo átti í hlut. En nú hefur hún skorað á Tíbet og allt verður vitlaust. New York Times, CNN, CNBC og fleiri miðlar gera þessu skil. 

Hér er svo video með laginu að finna á You Tube: