Vel heppnaður íbúafundur

Var að koma af velheppnuðum íbúafundi í Tryggvaskála þar sem fram komu hugmyndir og áherslur í bæjarmálum. Óhætt er að segja að mikill samhljómur hafi verið um aðalatriðin enda er fólk meðvitað um að nú þurfi að auka aðhald og breyta forgangsröðun. Skuldastaðan gerir allar nýframkvæmdir erfiðar og afgangur er enginn upp í vexti, verðbætur eða afborganir skulda Árborgar. Slíkt gengur aldrei lengi.

Annað sem kom vel fram er að betur má gera í að kynna sérstöðu og styrk sveitarfélagsins. Ferðamálin hafa marga mjög góða vaxtarsprota sem má gera meira úr. Þessi sóknarfæri þurfa ekki að kosta mikla fjármuni heldur fyrst og fremst þarf að hafa skýra sýn og samhæfa kraftana á svæðinu betur.

Lýðræðið er virkast þegar það er í grasrótinni og með fundum sem þessum sem öllum er opinn erum við í D-listanum að bjóða upp á beint samband sem er í senn frjótt og hugmyndaríkt auk þess að vera gagnrýnið á það sem betur má fara. Það er alltaf hætta við fulltrúalýðræðið að kjörnir fulltrúar lokist af í turni sínum. Mæting var góð og hugmyndirnar koma sér vel og verða veganesti inn í kosningarnar og vonandi nýtast þær vel eftir kjördag í vor.

Hér er svo mynd tekin á farsímann:

Haítí

Skelfilegt ástand á Haítí er eitthvað sem erfitt er fyrir okkur á Fróni að ímynda okkur. Miklar hörmungar hafa gengið yfir þessa eyju og nú er það þessi risa skjálfti. Nú er verið að safna hér á landi sem og annars staðar. Við eigum að styðja hjálparstarfið eins og kostur er á og utanríkisráðherra á hrós skilið fyrir að hafa tekið ákvörðun um að senda rústabjörgunarlið samstundis. Vandamál hversdagsins eru lítil miðað við það helvíti á jörðu sem ríkir á eyjunni Haítí.

Stórfrétt

Flokksráð VG styður ríkisstjórnina!

Það er ekki hægt að segja annað en að þetta sé fréttnæmt. 

Skyldi grasrótin styðja flokksráðið?

Flokksráð VG styður stjórnina

"You ain´t seen nothing yet"

Einhver óheppilegasti frasi síðustu ára í pólítík hlýtur að teljast "You ain´t seen nothing yet". Margir muna eftir hátíðarræðu forsetans þegar hann lét þessi orð falla um íslensku útrásina.

Þá var tölvupóstur Össurar Skarphéðinssonar frægur þegar hann lýsti Baugsmönnum sem bandítum og klykkti svo út með sömu setningu.

Nú hefur Steingrímur J. Sigfússon bæst í hópinn þegar hann sagði þennan ágæta frasa á opnum fundi um skattamál í gærmorgun. Ég var í salnum og verð að segja það eins og er að ég var ekki að trúa eigin eyrum. Steingrímur hélt því fram að stórfelldar skattahækkanir sem nú hafa tekið gildi séu aðeins fyrsta skrefið; you aint seen nothing yet!

Ekki veit ég af hverju utanríkisráðherra, fjármálaráðherra og forsetinn hafa allir leitað í þess sömu setningu.

Evrópa vaknar

Alain Lipietz og Eva Joly voru með sterka og skýra framsetningu vegna Icesave. Þeim finnst augljóst að ríkið eigi ekki að axla byrðarnar og reyndar sagði Alain að Bretar og Hollendingar bæru í raun meiri lagalega ábyrgð á reikningunum en Ísland.

Þetta framlag er hluti af mikilli bylgju vakningar í Evrópu um raunverulega stöðu Íslands. Það er með ólíkindum að það hafi ekki gerst fyrr en nú árið 2010 löngu eftir hrun.

Ögmundur og Ólafur Ragnar eiga hrós skilið fyrir sitt framlag í því að knýja umræðuna fram.

Ég trúi ekki öðru en Íslendingar standi nú saman og svo verði fenginn sáttasemjari til að leysa þetta á sanngjörnum nótum.

Brown í vörn

Um tíma virtist Brown vera að bjarga öllu í Bretlandi og reyndar vildi hann líta á sig sem bjargvætt hagkerfa heimsins. Þetta var í október 2008. Þá var hætta á kerfishruni víðar en á Íslandi.

Eitt af örþrifaráðunum var að tryggja innistæður umfram það sem tryggt er með tilskipunum ESB.

Nú er Brown í vörn gagnvart pólítískum andstæðingum sínum sem aldrei fyrr. Ekki bara í Íhaldsflokknum heldur líka flokksfélögum sínum í Verkamannaflokknum.

Skuldasöfnun breska ríkisins er stór vandi. Icesave útborgunin er aðeins lítill hluti þeirra.

Forseti Íslands, Eva Joly og fleiri aðilar á borð við Vicki Woods eru ósammála sjónarmiðum Browns og Darling.
Það ber að þakka fyrir þá sem tala fyrir Íslands hönd.

Telegraph: Engin ástæða til að Íslendingar greiði

No my lord

Lávarðurinn Hattersley lítur á Íslendinga sem undirmálsstofn enda séu Íslendingar komnir af þjófum eins og hann orðar það svo snyrtilega. Bretar eru margir komnir af aðalsmönnum og í því felast rök fyrir suma þeirra um að þeir séu þess vegna betri en aðrir menn.

Bretar voru umsvifamiklir á öldum áður og enn er hægt að virða fyrir sér dýrgripi hvaðan æva að úr heiminum t.d. í British Museum. Bretar hafa haft það fyrir reglu að skila þessum verðmætum ekki. Eitt dæmið er um Benin styttur sem eru aðeins til á ljósmyndum í þjóðminjasafni Nígeríu. Stjórnkerfi Benin var bælt niður og blóði úthellt. En sjálfsagt voru þar lávarðar á ferð en ekki ótíndir víkingar. 

Reynsla Hattersley af Íslendingum er einkum úr þorskastríðinu en þar voru Íslendingar frumkvöðlar í að færa út fiskveiði- og efnahagslögsögu sína. Frumkvæði þetta vakti mikla athygli enda fór svo að strandþjóðir um allan heim fylgdu á eftir. Fram að þeim tíma höfðu úthöfin verið án eftirlits og stórþjóðirnar veitt mikinn fisk jafnvel nálægt landi. Rányrkja vék fyrir fiskveiðistjórnun. Þorskastríðin snerust um það að Bretar vildu ekki viðurkenna rétt Íslendinga til að færa út lögsögu sína. Meirihluti þjóða heimsins stóðu með Íslandi og Hafréttarráðstefna Sameinuðu Þjóðanna útfærði þessi réttindi með Hafréttarsáttmálanum. Hattersley lávarður hlýtur að eiga sitthvað ótalað við þessar óprúttnu þjóðir sem hafa atkvæði hjá SÞ. Ætli þar séu ekki afkomendur sauðaþjófa?

Nei ég er hræddur um að lávarðurinn sé á villigötum. Hér segjum við hvorki Yes Minister eða Yes my lord. 

 

Hinir þrjósku Íslendingar

Engillinn Joly

Það er engu líkara en kapphlaup um svartsýni og dómsdagsspár sé að verða þjóðaríþrótt Íslendinga um þessar mundir.
Þótt Sigmundur Davíð hafi verið dreginn fram í Skaupinu sem sá sem fremstur sé í þeirri grein að mála skrattann er engu líkara en ríkisstjórnin sé að slá einhvers konar met.
Hótanir, aðvaranir og hrunaspár hafa farið yfir skynsamleg mörk og útkoman er sú að fólk er orðið hrætt.

Á erfiðum tímum þarf að telja kjark í fólk og á uppgangstímum er best að ganga hægt inn um gleðinnar dyr. Því miður virðist okkur þannig farið að á þenslutímanum var allt gott og við vorum "stórust". En nú þegar erfiðleikar eru þá er allt málað svörtum litum. Þessar öfgar eru ekki góðar.

Það er því þess ánægjulegra þegar einhver málsmetandi aðili rís upp fyrir okkur og telur í okkur kjarkinn. Eva Joly er slík kona enda á hún virðingu almennings nær óskipta.

Ég er ánægður með hvernig forsetinn hefur komið fram í erlendum fjölmiðlum og hefði mátt taka PR rispu fyrir Íslands hönd fyrr af hálfu ráðamanna. Betra er þó seint en aldrei og vonandi verður allt þetta sérstaka mál með þjóðaratkvæðagreiðsluna til þess að auka skilning erlendra aðila á stöðu Íslands. Fyrstu fyrirsagnir sýndu vel að raunveruleg afstaða Íslands hefur ekki verið kunn.

Joly harðorð í garð Hollendinga

Avatar er upplifun

Á dot.com tímanum var fengist við margt sem að framtíð snýr. Þrívíddarheimar spruttu upp þótt menn þyrftu að keyra þá á hægvirkum PC vélum þess tíma. Í dag er CCP með firnaflotta þrívíddarheima og svo er viðeigandi að fyrsti stórsmellurinn í 3D kvikmyndanna sé "Avatar". Sýndarmenni netheima hafa löngum verið kölluð "avatarar" bæði í 2D og 3D.

Ég gef Avatar bestu einkunn enda frábær leikstjóri sem hefur áður brotið blað í tækninotkun. Þrívídd hefur hingað til verið "gimmick" eða aukaáhrif tölvugerðra teiknimynda. Með Avatar er komin ný upplifun í bíóin. Ég held maður bíði með að sjá hana á DVD þar til 3D kemur heim í stofu.

p.s.

ég er ekki viss um að Bjarnfreðarson yrði neitt betri í 3D...

Íslenskar myndir mest sóttar

Dómsdegi aflýst

Það hefði verið skynsamlegt fyrir Breta að leita fyrr til ESB og vinna að lausn. Ekkert er minnst á dómsdag af hálfu breska fjármálaráðuneytisins.

Það er hins vegar sorglegt að sjá fréttaflutning af málinu þegar Íslendingar hafa nú þegar tekið á sig mun meiri skuldbindingar en (fyrri) lög gera ráð fyrir.

Nú finnst mér að ríkisstjórnin þurfi að stunda öflugt PR Íslandi til heilla.

Forsetinn fer hins vegar í sögubækurnar og er samkvæmur sjálfum sér.

Bretar leita til ESB

Lögin taka gildi

Það er sama hvort forsetinn staðfestir Icesave-lögin eða synjar þeim staðfestingar; lögin öðlast strax gildi.  

Bretar og Hollendingar geta því ekki haldið því fram að þau séu ekki í gildi eða hafi ekki verið samþykkt af Alþingi.

Reyndar er ekki hægt að halda öðru fram en að ríkisstjórnin hafi beitt sér allvel í að fá þau samþykkt á Alþingi. Synjun eða samþykki fullnustar lögin. Að minnsta kosti þangað til annað er ákveðið. . . 

26. grein stjórnarskrár Íslands: 

Ef Alþingi hefur samþykkt lagafrumvarp, skal það lagt fyrir forseta lýðveldisins til staðfestingar eigi síðar en tveim vikum eftir að það var samþykkt, og veitir staðfestingin því lagagildi. Nú synjar forseti lagafrumvarpi staðfestingar, og fær það þó engu að síður lagagildi, en leggja skal það þá svo fljótt sem kostur er undir atkvæði allra kosningabærra manna í landinu til samþykktar eða synjunar með leynilegri atkvæðagreiðslu. Lögin falla úr gildi, ef samþykkis er synjað, en ella halda þau gildi sínu.

Skyldi Egill eiga kollgátuna?

Nú stefnir í að 50 þúsund Íslendingar skrifi opinberlega undir áskorun á forseta Íslands um að synja Icesave skuldaábyrgðinni. Það er svona eins og fimmtíu milljónir Bandaríkjamanna hefðu undirritað ef miðað er við mannfjölda. Hafi "þjóðviljinn" verið skýr um eitthvert mál þá er það um þetta ólánslán. 

Fordæmi forsetans benda skýrt til þess að honum sé ekki sætt á öðru en að vísa þeim til þjóðarinnar. Ríkisstjórnin getur með "góðri samvisku" sagt við Hollendinga og Breta að hún hafi komið lögunum í gegnum þingið.

Egill Helgason tekur það djúpt í árinni að segja að forsetinn hljóti að synja lögunum staðfestingar:

http://silfuregils.eyjan.is/2009/12/31/forseti-tekst-a-vid-icesave-og-arfleifdina/ 

Skyldi hann eiga kollgátuna? 

Undirskriftir yfir 49.000

Gjörðu svo vel Ólafur Ragnar Grímsson...

Nú hefur Alþingi samþykkt einstaklega ömurlega skuldbindingu fyrir ríkissjóð og komandi kynslóðir. Skuldin sem nú er lögfest mun vafalaust bitna harðast á þeim sem minnst mega sín og minnsta ábyrgð bera á henni.

Nú er víst ríkisráðsfundur á morgun og án efa vill ríkisstjórnin fá staðfestingu forsetans fyrir áramót.
Ólafur Ragnar Grímsson er í vægast sagt sérstakri stöðu:

a) Hann sagði í kosningabaráttu sinni að hann myndi móta embættið með sínum hætti
b) Hann hefur einn forseta í lýðveldissögunni synjað lögum staðfestingar
c) Hann samþykkti fyrri lög um Iceasve ábyrgð með sérstakri áritun sem varðaði fyrirvarana

Ef samræmi er í embættisverkum Ólafs hlýtur hann að synja lögunum staðfestingar.

Já og svo hafa á fjórða tug þúsunda skorað á hann en það ku vera íslandsmet.

Alþingi samþykkti Icesave

IBG YBG

Mér sýnist samkomulagið í Kaupmannahöfn binda ekkert ríki til að binda eða losa minna af gróðurhúsalofttegundum. Talað er um að ríki muni beita margvíslegum leiðum.

Ef við gefum okkur að ógnin af hlýnun sé raunveruleg og af mannana völdum eins og staðfest er af þjóðarleiðtogunum sem tóku þátt í ráðstefnunni hlýtur að vera undarlegt að þeir hafi ekki getað ákveðið leiðir að markmiðum sínum. 

Markaðir og umhverfið hafa verið í brennidepli en samt breytast hlutirnir hægt. Thomas L. Friedman orðar mögulega ástæðu vel í bók sinni "Flat, hot and crowded" þegar hann segir að hugsunin hjá þeim sem ráða sé oft byggð á "IBG YBG" (I´ll be gone - you´ll be gone). Kjörtímabilin eru af þeirri lengd að hagvöxtur til meðallangs og skemmri tíma gengur framar langtímajafnvægi. Þetta á bæði við um fjármálamarkaði og umhverfið. 

Svo eru aðrir sem halda fast við þá skoðun að hlýnun og kólnun sé háð öðrum og öflugri öflum en vélum mannana. Snjókoman í Köben og snjóbylurinn sem tók á móti Obama þegar heim var komið var vatn á þá myllu. - Já og svo er Eurotunnel lokað vegna þess að lestarnar stöðvuðust vegna kulda!

Reyndar er það svo að desember hefur verið með hlýjasta móti á Íslandi en kuldahret og met hafa verið víða. 

Samkomulagið vonbrigði

Ekki batnar það

Í kvöld var samþykkt fjárhagsáætlun 2010 fyrir sveitarfélagið Árborg með 5 atkvæðum vinstri meirihlutans gegn 4 atkvæðum okkar. Áætlunin gerir ráð fyrir 629 milljóna króna tapi af rekstri árið 2010. Tapið er svipað og á yfirstandandi ári en það er áætlað 640 milljónir.

Samkvæmt áætluninni verður eigið fé neikvætt um 264 milljónir. Í raun er því lögð fram hér áætlun þar sem stefnir í tæknilegt gjaldþrot bæjarsjóðs um mitt næsta ár þegar eigið fé bæjarsjóðs verður upp urið. Það sem gerir málið enn verra er að ekki hefur tekist að stöðva tap fyrir fjármagnsliði en það eykst um 58% og er nú áætlað 147 milljónir.

Uppsafnað tap fyrir árin 2008-2010 er samkvæmt þessari fjárhagsáætlun 2480 milljónir á þremur árum eða meira en 2 milljónir hvern einasta dag. 

Ekki er útlit fyrir greiðsluþrot á árinu 2010 miðað við að það takist að fá 530 milljónir í ný lán á árinu. Meiri óvissa er með 2011 og hvernig unnt verður að tryggja fjármagn og forðast greiðsluþrot bæjarsjóðs.

Síðasta haust hófum við sameiginlega vinnu við fjárhagsáætlun. Við bæjarfulltrúar D-listans lögðum strax fram nokkur lykilatriði eins og að ekki væri tap af rekstri fyrir fjármagnsliði. Það og margt annað hefur ekki náð fram að ganga og því gátum við engan veginn samþykkt áætlunina. Það verður svo að bíða nýrrar bæjarstjórnar að vinna sig úr skuldasöfnuninni.

Það verður hvorki auðvelt verk né öfundsvert.

Kosið um Icesave ríkisábyrgðina - í bönkunum...

Það verður að þakka Eyjunni(.is) fyrir lýðræðið en vefsvæðið stendur nú fyrir kosningu um Icesave-ríkisábyrgðina. Kosningin er rafræn og fer fram í heimabanka hvers og eins. Slíkt er nýjung og tryggir ákveðið öryggi. Reyndar er það viðeigandi að fólk kjósi um þetta mál í sínum heimabanka enda skuldin komin til vegna ólánlegrar bankastarfssemi og svo mun reyna á heimabudduna ef af ríkisábyrgðinni verður.

Að sjálfsögðu er þessi kosning ekki bindandi fyrir þingheim en ef þáttaka verður góð hlýtur niðurstaðan að vera leiðbeinandi eins og það er stundum orðað.

Frumvarp um þjóðaratkvæði er til meðferðar um þessar mundir en ólíklegt er að þjóðin fái að kjósa um mesta hitamál seinni tíma nema forsetinn synji ríkisábyrgðinni staðfestingar. Sem er ólíklegt.

Sem sagt: Nú fáum við að kjósa og það verður fróðlegt að sjá hvað kemur upp úr heimabönkunum...

Sérstaða Íslands

Á Íslandi er öll raforkunotkun byggð á endurnýjanlegri orku. Sama er ekki að segja um eitt einasta þróað ríki sem stendur að loftslagsráðstefnunni í Köben. Markmið ESB þjóðanna hafa verið ýmist þau að draga úr losun á gróðurhúsaloftegundum eða þá að ná hlutfalli endurnýjanlegra orkugjafa upp í ákveðið hlutfall. Þetta hlutfall hefur stundum verið 20% á ákveðnum árum inn í framtíðina.

Stóriðja á Íslandi er umhverfisvæn þar sem hún byggir á endurnýjanlegri orku. Ef Ísland nýtir ekki orku sína er í raun (og praxis) vegið að markmiðum þeirra sem vilja auka hlutfall endurnýjanlegrar orku. Mannkynið mun áfram nota málma og orkufreka þjónustu á borð við gagnaver. Það sem ekki verður sett upp hér verður líklegast knúið af kolum.

Ban Ki-moon hæfilega bjartsýnn

stjórnarráðið.is

Ekki er það gott ef starfsmenn stjórnarráðssins eru uppteknir í þessum leik. Getur verið að Icesave sé að taka tíma frá fleirum en þingmönnum? Eða er þessi undirskriftasöfnun orðin óþægileg?

Ekki veit ég hvaða reglur gilda hjá opinberum stafsmönnum eða þá starfsmönnum ohf. eins og RúV um netnotkun. Netat sem þetta getur varla talist sæmandi. Hvað þá lýðræðislegt.

prívatpóstur til IMF og svo þetta...ætli þetta verði frétt á RúV?

Bullundirskriftir raktar til stjórnarráðsins